Иқдоми дарахтшинонӣ ва кабудизоркунӣ дар ноҳияи баландкӯҳи Мурғоб тайи се соли охир ба ҳукми анъана даромадааст. То ба имрӯз дар майдони зиёда аз 20 гектар дарахтони сояафкан шинонда шуда, аксарияти онҳо дар ҳоли сабзиш қарор доранд.

Соли ҷорӣ низ маъракаи ниҳолшинонӣ дар Ҷамоати деҳоти Аличор ва ҷамоати марказӣ дар майдони 10 гектар амалӣ гардида, ба ҳолати имрӯза беш аз 20 ҳазор дарахти сояафкан ва мевадиҳанда, аз қабили хучу ангат дар ноҳия шинонда шудааст.
Ҳамзамон, тибқи иттилои масъулини ноҳия дар ҷамоатҳои деҳот 26 гармхонаи хурд фаъолият намуда, ба парвариши маҳсулоти барвақтӣ сару кор доранд.

Иқдоми сабзу хуррамгардонӣ дар доираи дастуру ҳидоятҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон рӯи кор омада, он ба беҳтар гардидани муҳити зист ва саҳмгузорӣ дар ободониву созандагӣ мусоидат менамояд.

Садоншо ҶАНОБИЛШОЕВ, "ҶТ"