Имрӯз, 21 май дар Донишгоҳи давлатии Хоруғ ба номи Моёншо Назаршоев (ДДХ) бо ибтикори донишгоҳ ва Раёсати кор бо ҷавонон ва варзиши ВМКБ зери унвони “Нақши ҷавонон дар тарғиби ғоя ва арзишҳои миллӣ” мизи мудаввар баргузор гардид.

Дар чорабинӣ ректори донишгоҳ, профессор Шермамад Ҷонмамадов, сардори 
раёсат Сураҷ Чоршанбиев, корманди мақомоти ҳокимияти давлатии вилоят Арамбегим Маҳтобшозода, мудири Шуъбаи кор бо ҷавонони ДДХ Дидоршоҳ Насриддинов ва донишҷӯёну омӯзгорон иштироку баромад намуданд.

Нахуст Ш. Ҷонмамадов ҳозиринро ба муносибати Рӯзи ҷавонони Тоҷикистон табрику шодбош намуда қайд қард, ки феълан Роҳбарияти олии мамлакат сиёсати “Рӯ ба  ҷавонон” - ро  ҳамчун   яке  аз  самтҳои асосии сиёсати  давлатии  кишвар эълон  намуда, ба  масъалаи  тарбияи   сиёсӣ, маънавӣ  ва  ахлоқии  ҷавонон диққати махсус медиҳад:

“Пешвои миллат муҳтарам Эмомалӣ Раҳмон барҳақ ҷавононро нерӯи созанда, симо ва ояндаи миллат номида, тамоми  сиёсати  давлатро ба ташаккули зеҳнии ҷавонон ҳамчун созандагони Ватан равона намудааст. Ҷараёни пуртазоди ҷаҳонишавӣ, фазои васеи иттилоотӣ, бархурди тамаддунҳо дар рақобати ҷаҳонӣ моро ҳушдор медиҳад то наслеро тарбия карда, ба воя расонем, ки аз нигоҳи одобу ахлоқ, ҷаҳонбинӣ худшиносу ватандӯст бошанд, донишу лаёқат, худшиносиву ҷаҳонбиниаш ба талаботи  ҷаҳони муосир ҷавобгӯ бошад. Аз ин рӯ, дар фазои иттилоотии чаҳонӣ мо танҳо бо ахлоқи ҳамидаи миллӣ, одобу арзиши азалии тоҷикона муқовимат карда метавонем”– афзуд, ректори ДДХ.

Дар мизи мудаввар инчунин мавзӯъҳои “Ҷавонон - пайравони Пешвои миллат”, “Ҷавонон ва ҷомеаи  шаҳрвандӣ”,“Худшиносии сиёсии ҷавонон - рушди муҳими ҷомеа”, “Саҳми  чавонон дар тараққиёти саноати кўҳӣ”, “Ҷавонони насли истиқлоли Ҷумҳурии Тоҷикистон”, “Дар рӯҳияи  ватандӯстӣ ва  ватанпарастӣ тарбия намудани  насли ҷавон” мавриди баррасӣ қарор гирифтанд.