Дар соли таҳсили 2024-2025 нақшаи қабули донишҷӯён ба донишгоҳу донишкада ва дигар муассисаҳои таҳсилоти олии кишвар аз 105 ҳазору 816 ҷойи соли 2023 ба 96 ҳазору 164 ҷой расонида шуд, аммо бо ин вуҷуд довталабони ин зинаи таҳсил аз нақшаи қабул каманд.

Дар ин бора имрӯз - 30 июл Сабзалӣ Ҷаъфарзода, директори Маркази миллии тестии назди Президенти Ҷумҳурии Тоҷикистон иттилоъ дод.

Ба иттилои манбаъ дар ду давраи бақайдгирӣ барои имтиҳонҳои марказонидашудаи дохилшавӣ 82 ҳазору 542 нафар довталаби дорои таҳсилоти миёнаи умумӣ (синфи 11-ум), ибтидоӣ ва миёнаи касбӣ номнавис шудаанд, ки 85,8 фоизи нақшаи қабулро ташкил медиҳанд.

Ӯ гуфт бо вуҷуди оне ки ин нишондиҳанда нисбат ба соли 2023 6 ҳазору 354 нафар ва ё 8,34% зиёд аст, аммо ҳанӯз нигаронкунанда боқӣ мемонад.

Дар солҳои гузашта низ донишгоҳу донишкадаҳои кишвар чунин мушкилро доштанд. Дар соли 2023 аз 105 ҳазору 816 ҷойи ҷудошуда барои довталабон ҳамагӣ 76 ҳазору 188 довталаб дар ММТ аз қайд гузашта буданд, ки ин 72 фоизи нақшаро ташкил медод.