Дирӯз дар доираи нақшаи чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо Қувваҳои ҳарбӣ - ҳавоӣ ва мудофиаи зиддиҳавоии Қувваҳои Мусаллаҳи Ҷумҳурии Тоҷикистон маросими бошукӯҳи истиқболи сарбозон, ки бо сарбаландӣ ва эҳсоси баланди ватандӯстӣ хизмати ҳарбиро ба анҷом расониданд, баргузор гардид.

Қабл аз сафарбар гардидани онҳо ба шаҳру ноҳияҳои кишвар, бо сарбозон мулоқоти судманд доир карда шуд. Мулоқот таҳти роҳбарии муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Чоршанбезода Сураҷ Сайнак ва бо иштироки намояндаи Вазорати мудофиаи Ҷумҳурии Тоҷикистон баргузор гардид.

Муовини раиси Кумита зимни мулоқот ба сарбозон барои хизмати содиқона ва адои қарзи муқаддаси шаҳрвандӣ изҳори сипос намуда, ба онҳо дар идомаи фаъолияти минбаъда барору комёбиҳо таманно намуд. Ҳамчунин, аз тарафи Кумита раҳматнома ба волидайн ва билети ҳарбии онҳо бо тантана тақдим гардид.

Сарбозони шуҷоъ пас аз адои қарзи муқаддаси шаҳрвандӣ бо руҳияи баланд ва таҷрибаи ғании ҳаётӣ ба маҳалли зисти худ сафарбар гардида, аз ҷониби ҷомеа ва пайвандон бо эҳтирому самимияти хосса истиқбол гирифта мешаванд.

Ин иқдом ҳамчун нишонаи қадршиносӣ аз ҷасорату фидокории ҷавонони далери Ватан арзёбӣ гардида, дар таҳкими ҳисси ватандӯстӣ, худшиносии миллӣ ва эҳтиром ба Артиши миллӣ нақши муҳим мегузорад.

“ҶТ”