Дар шашмоҳаи аввали соли 2025 дар маҷмуъ 14,8 ҳазор ҳолати ҳуқуқвайронкуниҳои андозӣ, асосан вобаста ба масъалаҳои беқайд дар мақомоти андоз машғул шудан ба фаъолияти соҳибкорӣ, риоя накардани муҳлати пешниҳоди эломияҳои андозӣ, риоя накардани тартиботи истифодаи дастгоҳҳои назоратӣ –хазинавӣ ва кам нишон додани маблағи андоз ошкор ва шахсони дахлдор ба ҷавобгарии маъмурӣ кашида шудааст.

Дар ин бора Нусратулло Давлатзода, раиси Кумитаи андози назди Ҳукумати Ҷумҳурии Тоҷикистон 8 август зимни нишасти матбуотӣ иттилоъ дод.

Ӯ дар шарҳи хабар гуфт, дар натиҷаи ба ҷавобгарии маъмурӣ кашида шудан, ба маблағи умумии 331,0 млн сомонӣ ҷаримаҳои маъмурӣ татбиқ гардида, аз ин ҳисоб ва аз ҳисоби ҷаримаҳои солҳои қаблӣ татбиқшуда, ба буҷети ҷумҳуриявӣ зиёда аз 291,0 млн сомонӣ маблағ ворид карда шуданд, ки нисбат ба ҳамин давраи соли гузашта 89,4 млн сомонӣ зиёд мебошад.

Инчунин, зикр шуд, ки дар нимсолаи якуми соли 2025 иҷрои нақшаи воридоти андозҳо ва дигар пардохтҳои ҳатмӣ ба андозаи 113,7% таъмин гардида, ба ҷойи 11 млрд 187,4 млн сомонӣ, ба буҷети давлатӣ 12 млрд 715,7 млн сомонӣ ворид карда шуд, ки нисбат ба нишондиҳандаҳои пешбинишуда 1 млрд 528,2 млн сомонӣ зиёд мебошад.

М. МУҚАДДАМОВА, “ҶТ”