Миҷгона Самадова, муштзанбонуи тоҷик дар Чемпионати Осиё оид ба бокс, ки дар шаҳри Улан-Батори Муғулистон ҷараён дорад, бо рақобатҳои диданӣ ва нерусанҷии қавӣ соҳиби медали биринҷӣ гардид.

Дар рӯзи нуҳуми мусобиқа рақобатҳои марҳили нимниҳоӣ баргузор шуда, дар ин марҳилаи мусобиқа кишвари моро Миҷгона Самадова (57 кг), Некрӯз Салимов (80 кг) ва Парвиз Каримов намояндагӣ доранд.

Миҷгона Самадова дар вазни 57 кг дар марҳилаи нимниҳоӣ бо намояндаи Тайланд Пунрави Руэнрос нерӯсанҷӣ кард. Дар ин нерӯсанҷӣ Миҷгона давоми се раунд муқобили Руэнрос арзанда нерӯсанҷӣ карда, бо қарори ҷудогонаи доварон бо ҳисоби 4 бар 1 мағлуб шуд ва соҳиби нишони биринҷӣ гардид.

Барои Миҷгона Самадова ин дуюмин нишони биринҷӣ дар Чемпионати Осиё мебошад. Қаблан, Самадова дар Чемпионати Осиёи соли 2021 дар Дубай медали биринҷӣ гирифта буд.

Ёдовар мешавем, ки Чемпионати Осиё оид ба бокс 30 март дар шаҳри Улан-Батори Муғулистон оғоз шуда, то 10 апрел идома мекунад. Дар мусобиқаи мазкур намояндагони 25 кишвар ва 230 муштзан ширкат доранд. Ин мусобиқа таҳти сарпарастии World Boxing баргузор шуда истодааст.

“ҶТ”