Бо ифтихору самимияти хосса имсол низ Паёми Пешвои миллат муҳтарам Эмомалӣ Раҳмонро тамошо кардем. Дар толори зебову беназир - Парлумони Тоҷикистон ҷаласаи якуми якҷояи Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон даъвати ҳафтум доир гардид, ки дар он Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо Паёми худ “Дар бораи самтҳои асосии сиёсати дохилию хориҷии Ҷумҳурии Тоҷикистон” ба Маҷлиси Олии кишвар суханронӣ намуданд.

Мардуми шарифи Тоҷикистон дар тамоми гӯшаву канори диёр тариқи оинаи нилгун ин пайки накӯи Сарвари кишварро тамошо карда, барои хеш дунёи маънӣ гирифтанд.

Воқеан, Паёми Пешвои миллат як пайки наку, каломи пурвусъату созанда, тантанаи давлату миллат, шукӯҳи шаъну эътибори миллат барои тамоми мардуми Тоҷикистон ва тоҷикони ҷаҳон маҳсуб меёбад. Ҳар иқдомоту сиёсати оқилона, суханрониҳои падарона ва қаҳрамононаи Пешвои миллат барои мо роҳнамо ва ҳидоятгар аст.

Сулҳу субот, оромӣ, истиқлолу озодӣ неъмати бебаҳост. Пешвои миллат муҳтарам Эмомалӣ Раҳмон зимни ироаи Паёми хеш таъкид намуданд, ки бояд ба қадри сулҳу субот, оромӣ ва ободӣ бирасем. Бузургии миллати тоҷик дар сарҷамъӣ, суботу самимият, якдигарфаҳмӣ, дӯстиву рафоқат инъи-кос меёбад. Паёми имсола барои мардуми шарифи Тоҷикистон муждаи баҳороину хирадоин дода, мардуми сарбаландро ба кору пайкори дилгармона, меҳнату садоқати гарму самимии тоҷикона ҳидоят мекунад. Эълон гардидани соли 2026 ”Соли вусъат додани корҳои ободониву созандагӣ ва тақвияту таҳкими худшиносиву худогоҳии миллӣ” исботи гуфтаҳои болост.

Аз пайки накуи Паёми Пешвои миллат, ки барои мардуми тоҷик ид аст, шоир басо зебо ба қалам додааст:

Барои миллати соҳибватан Паём муборак,
Забону миллату таъриху нангу ном муборак!
Зуҳури тозаи фарҳангу фарру ҷом муборак,
Давоми дигари ин роҳи бардавом муборак!

Агар чароғе дар торикӣ бароямон равшанӣ кунад, каломи Пешвои миллат тамоми роҳи ояндаи кишвари азизамонро мунаввару мунаққаш мегардонад. Суханронии Пешвои миллат на танҳо як Паём аст, балки каломи фардост, каломи эътимоднок.

Каломи пурвусъату боҷасоратона, роҳнамои фардои дурахшони миллати куҳан маҳсуб мешавад. Зеро дар он эҳёи таъриху тамаддун, забону фарҳанг, созандагиву бунёдкорӣ ва ояндаи рахшони кишвар зуҳур кардааст.

Чунончи аз Паём бармеояд, 3 миллиону 200 ҳазор нусха китобҳои “Тоҷикон”-и аллома Бобоҷон Ғафуров ва “Шоҳнома”-и безаволи Фирдавсӣ чоп ва ба мардуми кишвар ройгон туҳфа карда шуд.

Пешвои миллат дар тамоми суханрониҳо ва махсусан дар Паёми имсолаи хеш низ ба ҷавонони кишвар муроҷиат карда, насли навинро ба сохтани ояндаи нек ҳидоят карданд. Тавваҷуҳ ва ғамхориҳои пайвасати давлату Ҳукумати Ҷумҳурии Тоҷикистон нисбат ба ин қишри ҷомеа беназир аст.

Ҳамчунин, Пешвои миллат ироа намуданд, ки соли 2026 барои мо соли таърихӣ, яъне 35-солагии Истиқлоли давлатӣ мебошад.

Бигзор, Истиқлоли давлатии Тоҷикистон пояндаву устувор бошад. Зери роҳбарии Пешвои миллат кишвари мо ободу пешрафтатар бигардад. Моро зарур аст, ки зери пайравии Сарвари кишвар ба Ватани азизамон содиқона ва софдилона хизмат намуда, барои баланд бардоштани Парчами миллӣ, ҳифзи арзишҳои миллӣ ва маънавӣ ҳиссагузор бошем. Чун дар Паёми имсола Пешвои миллат ба мо – ҷавонон рӯ оварда, иброз намуданд: “Бовар дорам, ки ҷавонони бонангу номуси даврони истиқлол дар пешрафти иқтисоди миллӣ, тараққиёти давлат ва ободии Ватани худ минбаъд низ саҳми арзишманд мегузоранд”.

Шаҳзод ҚАЮМОВ,
ғолиби озмуни ҷумҳуриявии
“Фурӯғи субҳи доноӣ китоб аст”
дар соли 2025