Дар ноҳияи Фирдавсӣ бахшида ба Рӯзи ҷавонони Тоҷикистон ва Рӯзи ҷаҳонии футбол 3 майдончаи нави варзишӣ мавриди баҳрабардорӣ қарор гирифт.

Иншооти варзишӣ дар доираи сиёсати варзишпарваронаи Роҳбарияти Олии мамлакат ва бо дастгирии мақомоти иҷроияи ҳокимияти давлатии шаҳри Душанбе бунёд гардида, онҳо барои машқу тамрини ҷавонону наврасон ва баргузории мусобиқаҳои варзишӣ шароити мусоид фароҳам меоранд.

Дар маросими ифтитоҳ масъулини шаҳри Душанбе, намояндагони Кумитаи кор бо ҷавонон ва варзиш, инчунин сокинони маҳаллӣ иштирок намуда, таъкид карданд, ки чунин иқдомҳо барои рушди тарзи ҳаёти солим, тарбияи ҷавонони ватандӯст ва пешгирии омилҳои номатлуб аҳамияти муҳим доранд.

Ҳамзамон, ба як қатор соҳибкорон ва шахсони саҳмгузор барои мусоидат дар бунёду ободонии майдончаҳои варзишӣ сипоснома тақдим карда шуд.

“ҶТ”