Имрӯз 25 май дар ҳошияи Конфронси чоруми байналмилалии сатҳи баланд оид ба Даҳсолаи байналмилалии амал “Об барои рушди устувор, 2018–2028” дар шаҳри Душанбе Форуми ҷавонон ва об баргузор гардид.

Дар қисмати ифтитоҳии форум муовини Сарвазири Ҷумҳурии Тоҷикистон Зиёзода Сулаймон Ризо суханронӣ намуда, нақши ҷавононро дар ҳифзи захираҳои об ва татбиқи ҳадафҳои рушди устувор муҳим арзёбӣ кард.

Зикр гардид, ки Тоҷикистон ҳамчун кишвари пешсаф дар пешбурди масъалаҳои обу иқлим дар арсаи байналмилалӣ пайваста ташаббусҳои созандаро пешниҳод менамояд. Таъкид шуд, ки истифодаи оқилонаи захираҳои об, ҳифзи муҳити зист ва ҷалби фаъоли ҷавонон ба ҳалли масъалаҳои глобалӣ аз самтҳои муҳими сиёсати давлатӣ ба шумор меравад.

Ҳамзамон, дар доираи конфронс дар Боғи фарҳангию фароғатии “Наврӯзгоҳ” Фестивали об баргузор гардида, дар он ҳунарҳои мардумӣ, маҳсулоти кишоварзӣ, таомҳои миллӣ ва барномаҳои фарҳангӣ таҳти унвони “Об – манбаи ҳаёти инсоният” ба намоиш гузошта шуданд.

Яҳё МАҲМАДНАБИЕВ, “ҶТ”