Аз соли 2027 ҳамаи бошгоҳҳои лигаи олии Тоҷикистон вазифадор гардиданд, ки дастаҳои занонаи худро ташкил кунанд. Ин ва як қатор қарорҳои муҳими дигар дар ҷаласаи Кумитаи иҷроияи Федератсияи футболи Тоҷикистон рӯзи 20-уми декабр дар шаҳри Душанбе қабул гардид. Тавсия дода шуд, ки ин талабот аз соли 2026 ҳамчун лоиҳаи озмоишӣ мавриди татбиқ қарор гирад.

Бояд гуфт, ки мавсими нави лигаи олии футболи Тоҷикистон аз 6-уми марти соли 2026 оғоз шуда, бо иштироки 12 даста баргузор мегардад.

Дар ҷаласа, ҳамчунин, тартиби нави маҳдудияти бозигарони хориҷӣ тасдиқ шуд. Тибқи он, дар мавсими 2026 ҳар як бошгоҳи лигаи олӣ ҳуқуқ дорад то ҳафт бозигари хориҷиро ба дархост ворид намуда, дар як вақт панҷ легионерро ба майдон барорад.

Кумитаи иҷроияи ФФТ макони баргузории бозии Суперҷоми Тоҷикистон-2026-ро низ муайян кард. Ин рақобат байни қаҳрамони кишвар - “Истиқлол”-и Душанбе ва барандаи Ҷоми Тоҷикистон — “Регар-ТадАЗ”-и Турсунзода 23-уми май дар Варзишгоҳи марказии шаҳри Ҳисор баргузор хоҳад шуд.

Ғайр аз ин, баргузории марҳилаҳои 1/8-ниҳоӣ, чорякниҳоӣ ва ниманиҳоии Ҷоми Тоҷикистон-2026 тасдиқ гардид. Дар ҳар як марҳила дастаҳо ду бозӣ анҷом медиҳанд. Бозии ниҳоии мусобиқа дар варзишгоҳи “Вахш-Арена”-и шаҳри Бохтар доир мешавад.

Бо тавсияи Кумитаи иҷроия, Лигаи футболи Тоҷикистон вазифадор шуд, ки ҳаҷми фонди ҷоизавии Ҷоми Тоҷикистонро зиёд намуда, ҳамзамон барои мусобиқаи қаҳрамонии кишвар байни дастаҳои лигаи олӣ мукофотпулӣ таъсис диҳад.

Тибқи қарорҳои нав, аз мавсими 2026 ҳар як бошгоҳи лигаи олӣ бояд як бозигари ҷавони соли таваллудаш 2008 ё ҷавонтарро ба ҳайати асосӣ дохил намояд. Ин бозигар танҳо бо ҳамсолаш иваз карда мешавад.

Дар ҷаласа ба рушди футзал низ таваҷҷуҳи махсус зоҳир карда шуд. Ба Кумитаи кор бо ҷавонон ва варзиш тавсия дода шуд, ки дар мактабҳои махсуси футбол дар саросари кишвар гурӯҳҳои футзал таъсис диҳанд.

Яҳё МАҲМАДНАБИЕВ, “ҶТ”