Муассисаи таълимии ғайридавлатии “Донишкадаи тиббӣ-иҷтимоии Тоҷикистон” соли 2024 аввалин маротиба аз аккредитатсияи аввалияи байналмилалии (EX-ANTE) Агентии мустақили аккредитатсия ва рейтинг (IAAR) “Оид ба муқаррар намудани тарзи таҳия ва қабули барномаи таҳсилоти самти (ихтисос) 1-79 01 01 “Кори табобатӣ”- и факултети “Тиббӣ”- и донишкада гузашт, ки муҳлати коршоямии он се сол муқаррар шудааст.

Ин нуктаро 12 феврал Зарина Ибодзода, ректори МТҒ “Донишкадаи тиббӣ-иҷтимоии Тоҷикистон” зимни нишасти матбуотӣ баён намуд.

Гуфта шуд, айни ҳол дар донишкада 29 кафедра фаъолият дорад, ки аз ин 5 кафедра соли ҷорӣ таъсис дода шудаанд. Аз шумораи умумии кафедраҳои донишкада 22-то ин кафедраҳои тахассусӣ мебошанд.

Иброз гардид, ки соли ҷорӣ ба донишкада 863 нафар довталабон қабул карда шудаанд, ки 96,4 фоизи нақшаи қабулро ташкил медиҳад. Дар заминаи таҳсилоти миёнаи касбӣ (самти тиб) идомаи таҳсил 67 нафар ва дар шакли таҳсилоти дуюм (баъди таҳсилоти олии касбӣ) 12 нафар қабул карда шуданд. Дар умум қабул дар соли ҷорӣ 942 нафарро ташкил додааст. Соли ҷорӣ 58 нафар шаҳрвандони хориҷӣ низ ба донишкада қабул карда шудаанд.

Иттилоъ дода шуд, ки раёсати донишкада нақша дорад, дар оянда бо назардошти талабот як факултети ҷадиди бозомӯзӣ ва такмили ихтисос таъсис диҳад, ки дар он омӯзиши як қатор ихтисосҳои нави ҷавобгӯ ба талаботи бозори меҳнат ба роҳ монда хоҳад шуд. Ҳамчунин, вобаста ба солҳои рушди иқтисоди рақамӣ ва инноватсия таъсиси 5 ихтисоси нав дар назар дошта шудааст.

Шаҳло ЭШОНОВА, “ҶТ”