Имсол дар назди Донишгоҳи байналмилалии забонҳои хориҷии Тоҷикистон ба номи Сотим Улуғзода гимназия таъсис дода шуд.

Дар ин хусус имрӯз - 1 август, Жило Гулназарзода, ректори Донишгоҳ ба хабарнигорон иттилоъ дод.

Ба гуфтаи ректор таҳсил бо се забон: тоҷикӣ, русӣ ва англисӣ сурат гирифта, тибқи фармоиши директори Агентии назорат дар соҳаи маориф ва илми назди Президентии Ҷумҳурии Тоҷикистон гимназия имкон дорад то 350 нафар хонандаро ба таълим фаро гирад. Ҳамчунин, Агентӣ ба Донишгоҳ иҷозат додааст, ки 60 нафари дигарро дар Маркази инкишофи кӯдак, ки дар назди гимназия таъсис дода шудааст, ба таълим фаро гирад.

Дар иртибот ба ин, барои пешбурди фаъолияти таълимӣ дар шабакаҳои иҷтимоӣ барои қабули хонандагон аз синфи 1 то 11 ва Маркази инкишофи кӯдак маводи таблиғотӣ нашр гардида қабули хонандагон аз 1 июни соли 2024 оғоз гардидааст.

Аз шуморам умумии донишҷуён дар шуъбаи рӯзона 3208 нафар (21 нафар хориҷӣ) ва дар шуъбаи таҳсилоти фосилавӣ 1877 нафар (374 нафар хориҷӣ), дар зинаи магистратура 83 нафар, дар зинаи докторантура 30 нафар таҳсил мекунад. 11 нафар донишҷӯёни хориҷӣ дар донишгоҳ забони тоҷикӣ меомӯзанд.