Дар толори маҷлисгоҳи Мақомоти иҷроияи ҳокимияти давлатии ноҳияи Деваштич санаи 10 июл, бо иштироки намояндаи Ҳукумати Ҷумҳурии Тоҷикистон дар ноҳия, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Абдулло Раҳмонзода, намояндаи МИҲД-и вилояти Суғд, Сардори Раёсати кор бо ҷавонон ва варзиши вилояти Суғд Мирзоқосим Каримзода ва раиси ноҳия Ашуралӣ Ҷалилзода маҷлиси ҷамъбастӣ оид ба натиҷаҳои рушди иқтисодию иҷтимоии ноҳия дар нимсолаи аввали соли 2021 баргузор гардид.

Дар ҷаласа аз ҷониби раиси ноҳия тамоми соҳаҳои хоҷагии халқ мавриди таҳлилу натиҷагирӣ қарор дода шуда, ҷиҳати ислоҳи камбудиҳои ҷойдошта, ба масъулин дастуру супоришҳо дода шуд.

Ҳамчунин дар ҷаласа Абдулло Раҳмонзода, намояндаи Ҳукумати Ҷумҳурии Тоҷикистон дар ноҳияи Деваштич суханронӣ намуда, ҷиҳати иҷроиши нақшаи чорабиниҳои ҷашни 30-солагии Истиқлолияти давлатии Ҷумҳурии Тоҷикистон, дар муҳлатҳои муқарраргардида бо сифати баланд ба иҷро расонидани сохтмони иншоотҳои ҷашнӣ, иҷроиши нақшаи андоз, пурзӯр намудани корҳои фаҳмондадиҳӣ байни аҳолӣ бобати пешгирии паҳншавии бемории сироятии коронавируси COVID-19, таъмири босифати муассисаҳои таълимӣ, таъминоти мактабҳо бо китобҳои фаннӣ, риояи қонуни танзим ва ҷашну маросим, ба роҳ мондани кишти такрорӣ ва ҷоннок намудани корҳои ободониву созандагӣ баҳри истиқболи сазоворонаи ҷашни 30 – солагии Истиқлолияти давлатӣ ба масъулин ва фаъолони ноҳия пешниҳодоту тавсия ва дастурҳо доданд.