Имрӯз дар муассисаи давлатии “Академияи ВАО”-и кишвар оид ба инъикоси имкониятҳои сайёҳии Ҷумҳурии Тоҷикистон барои кормандони шабакаҳои телевизионию радиоӣ ва нашрияҳо дарси маҳорат доир гардид.

Дарси мазкур аз ҷониби намояндаи ширкати телевизионии “Фрай Бровзер”-и Амрико Эрнест Эдвар Уайт гузаронида шуда, дар он усулҳои муосири истифодаи медиаро барои тарғиби захираҳои туристӣ ва бадин васила ҷалби сайёҳони хориҷиро пешниҳод карданд.

Эрнест Эдвар Уайт, ки тӯли як моҳ аст, дар Тоҷикистон қарор дорад, таассуроти худро оид ба табиат, мардуми меҳмоннавоз ва урфу одатҳои тоҷикон иброз дошт.

Қайд карда шуд, ки воситаҳои ахбори оммаи чопию электронӣ яке аз василаҳои муҳими муаррифии мавзеъҳои сайёҳӣ ва ҷалби сайёҳон дар ҷаҳон ба ҳисоб меравад. Боназардошти он ки Тоҷикистон дорои табиати беҳамто мебошад, нишон додани минтақаҳои сайёҳӣ барои рушди соҳа дар кишвар мусоидат мекунад.

Наҷиба МУРОДБЕКОВА,
Гулбаҳор РАҲМОНОВА, “ҶТ”