Дар толори Театри мусиқию мазҳакавии ба номи М. Назарови шаҳри Хоруғ чорабинии бошукӯҳи фарҳангӣ ба муносибати 32 - солагии таъсисёбии Қувваҳои Мусаллаҳи Ҷумҳурии Тоҷикистон баргузор гардид.

Раиси ВМКБ Мирзонабот Алишер Худобердӣ зимни ироаи суханони шодбошӣ зикр кард, ки бо талошу заҳматҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Қувваҳои Мусаллаҳи Ҷумҳурии Тоҷикистон таъсис ёфта, марҳила ба марҳила ташаккул ва таҳким ёфт.

Артиши ҷавон, хусусан, дар солҳои душвори фоҷеабори ҷанги шаҳрвандӣ якҷо бо мақомоти ҳифзи ҳуқуқи кишвар дар ҳифзи истиқлоли давлатӣ, ҳимояи марзҳои Ватан, безарар гардонидани гурӯҳҳои террористиву экстремистӣ, дастаҳои мусаллаҳи ҷинояткори тарансмиллии нашъаҷаллоб ва ғайра саҳми сазовору ҷавонмардона гузошт.

Гуфта шуд, ки Ҳукумати Ҷумҳурии Тоҷикистон таҳти роҳбарии Пешвои миллат муҳтарам Эмомалӣ Раҳмон аз лаҳзаҳои аввали бунёди он бо вуҷуди буҳрони иқтисодӣ барои сохтмони инфрасохтори зарурӣ, пояҳои кадрию молиявӣ ва моддии ҷузъу томҳои он эътибори махсус дода, дар баробари таъминоти онҳо бо техникаву таҷҳизоти муосири ҷангӣ, ҳамчунин, бо мақсади омодасозии кадрҳои низомӣ, ба таъсиси муассисаҳои касбии марбута шурӯъ намуд.

- Имрӯз Артиши миллӣ сипари боэътимоди давлату миллат буда, барои ҳифзи марзу буми Ватан аз генералҳо то афсарону сарбозон омода ҳастанд, ки ҳар як ваҷаби хоки муқаддаси Ватан ва арзишҳои волои миллиро бо қиммати ҷони хеш ҳимоя ва ҳифз намоянд, - афзуд раиси вилоят.

Дар идомаи чорабинӣ иддае аз афсарон, кормандон ва собиқадорони Қувваҳои Мусаллаҳи қисмҳои ҳарбии вилоят бо Ифтихорнома ва туҳфаҳои хотиравӣ қадр гардиданд.

Сипас, барномаи бошукӯҳи фарҳангӣ бо беҳтарин таронаҳои ватандӯстона дар таҳияи аҳли фарҳанги вилоят манзури ҳозирин гардонида шуд.

С. ҶАНОБИЛШОЕВ, “ҶТ”