Шурӯъ аз 1 май тайи як ҳафтааст, ки кормандони Вазорати меҳнат, муҳоҷират ва шуғли аҳолии Ҷумҳурии Тоҷикистон ба таври шабонарӯзӣ дар фурудгоҳҳои кишвар навбатдорӣ намуда, ба муҳоҷирони меҳнатие, ки ба ватан бармегарданд ё мақсади барои кор ба хориҷи кишвар рафтан доранд, корҳои фаҳмондадиҳӣ гузаронида истодаанд.

Дар ин бора аз дафтари матбуотии Вазорати меҳнат, муҳоҷират ва шуғли аҳолии Ҷумҳурии Тоҷикистон хабар доданд.

Ба иттилои манбаъ ин навбатдориҳо бо супориши Гулнора Ҳасанзода, вазири меҳнат, муҳоҷират ва шуғли аҳолӣ сурат гирифта, ҳадаф аз баргузор намудани чунин чорабиниҳо ба шаҳрвандон фаҳмонидани тағйиру иловаҳо дар қонунгузории Федератсияи Россия, Қазоқистон ва дигар кишварҳое, ки муҳоҷиронро қабул мекунанд, мебошад.

Зимни баргузории чунин чорабинҳо масъулини Вазорат аз муҳоҷирони меҳнатӣ хостаанд, ки дар гузаргоҳҳои гумрукӣ ба саволҳои сарҳадчиён дар бораи худ маълумоти дақиқ пешниҳод намоянд, фаъолияти кории худро дар асоси патент ба роҳ монанд ва қонунҳои мамлакати мизбонро ба таври бояд риоя кунанд.

Хотиррасон мекунем, ки чанде пеш Вазорати корҳои хориҷии Ҷумҳурии Тоҷикистон ба шаҳрвандони кишвар муроҷиат намуда, тавсия дода буд, ки аз сафар ба қаламрави Россия бе зарурат муваққатан худдорӣ намоянд. Ҳамчунин, ВКХ як рӯз қабл аз шаҳрвандон хост, ба хотири оне ки дар гузаргоҳҳои гумрукии Қазоқистон ҷиҳати ҷилавгирӣ аз терроризм тафтишот сахттар карда шудааст, пеш аз сафар ба ин кишвар ҳуҷҷатҳои заруриро бо худ гиранд, то ба мушкил мувоҷеҳ нашаванд.

Наҷиба МУРОДБЕКОВА, “ҶТ”