Имрӯз - 10 август бахшида ба Рӯзи варзишгарони Ҷумҳурии Тоҷикистон дар тарабхонаи Яккачинори шаҳри Душанбе ҳамоиши тантанавии фарҳангӣ - фароғатӣ ва варзишию солимгардонӣ таҳти унвони “Варзиш - пайки сулҳ, дӯстӣ ва созандагӣ” баргузор гардид.

Чорабинӣ аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон роҳандозӣ гардида, дар он роҳбарон ва намояндагони вазорату идораҳо, федератсияҳои варзишии кишвар, директорони муассисаҳои варзишии ҷумҳуриявию шаҳрӣ ва мураббиёну варзишгарони касбии кишвар ширкат намуданд.

Ҳамоиш бо садо додани Суруди миллӣ оғоз гардида, Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон онро расман ифтитоҳ намуд.

Зулфиқор Гулаҳмадзода зимни суханронии хеш тамоми варзишгарону мураббиён ва масъулини соҳаро ба Рӯзи варзишгарон табрик гуфта, барояшон саломативу сиҳатмандӣ ва дар роҳи пуршарафи варзиш ба онҳо барору комёбиҳо таманно намуд.

- Имсол ин санаи фархунда дар фазои омодагӣ ба таҷлили 35-солагии Истиқлоли давлатии Ҷумҳурии Тоҷикистон баргузор мегардад. Ин ҳамоҳангии ду рӯйдоди муҳим барои аҳли варзиш маънои хосса дорад, зеро дар тули сию панҷ соли соҳибистиқлолӣ варзиш на танҳо роҳи рушди худро тай кард, балки ба яке аз воситаҳои муассири муаррифии Тоҷикистон дар арсаи байналмилалӣ табдил ёфт,- афзуд раиси Кумита.

Дар идома Неъматзода Маликшо, муовини якуми раиси Ҳизби Халқии Демократии Тоҷикистон низ варзишгаронро ба иди касбиашон табрик намуда, ба онҳо барору комёбиҳо хост.

Гуфта шуд, ки варзиш қосиди сулҳ ва дӯстӣ миёни миллатҳо буда, тамоми ҷаҳонро ба ҳам меорад. Хушбахтона дар ин роҳ саҳми варзишгарони тоҷик низ ҳаст, ки боиси ифтихор ва шарафмандии кулли мардуми Тоҷикистон аст.

Пас аз суханрониҳо қисмати фарҳангии чорабинӣ ҷараён гирифта, дар он сарояндагон сурудҳои ватандӯстонаро пешкаши ҳозирон гардониданд.

Дар идомаи чорабинӣ ба собиқадорону варзишгарон мукофотпулӣ, туҳфаҳои хотиравӣ ва унвонҳои варзишӣ тақдим карда шуд.

Шаҳноза АЗИМОВА, “ҶТ”