Ӯ субҳи барвақт ба кор меояд. Бо чеҳраи пуртабассуму шавқи зиёд. Пас аз чанд дақиқа рӯзи кориаш оғоз мегардад. Инак, кӯдакони хушҳолу хушбахти даврон ва бехабар аз ташвишҳои рӯзгор вориди синфхонаи боғча хоҳанд шуд. Бо бесабрӣ мунтазири ин фариштаҳои нозанину зебост. Фариштаҳое, ки на танҳо боиси шодии ӯ, балки зебу зиннат ва маънои зиндагии волидонанд.

“Салом муаллимаҷон”, - гуфта яке паси дигар вориди синфхона мешаванд. Ва бо ҳузури худ синфхонаро ранги дигар медиҳанд. Оромиву сукути чанд лаҳза пеш мешикананд ва ба зиндагӣ гӯё ҷараён ва нафаси тоза мебахшанд. Бо хушҳолии зиёдашон. Бо бепарвоӣ ва дунёи рангини кӯдакиашон. Ин ҳамаро ӯ мебинаду дӯст медорад. Чун мураббӣ асту дилбохтаи ин кӯдакону пешаи худ.

Қаҳрамони мо Шукрона Мадиева, мураббии Муассисаи таҳсилоти томактабии №119-и ноҳияи Фирдавсии шаҳри Душанбе мебошад.

Ӯ мураббиест дӯстдори касби худ. Дӯстдори кӯдакону наврасон. Тавре дар мавриди алоқааш ба ин касб мегӯяд: “Замони мактабхонӣ бештар фанҳои дақиқ, монанди химия ва биологияро дӯст медоштам. Аммо вақте устодон ба мо дарс мегузаштанду чизҳои бароямон нофаҳморо шарҳ медоданд, ин бештар бароям ҷолиб буду маро ба самти худ ҷалб менамуд. Аз ҳамон давра хоҳиши омӯзгор шудан дар қалбам пайдо шуд. Пас аз хатми мактаб ҳуҷҷатҳоямро барои идомаи таҳсил дар риштаи омӯзгорӣ супоридам. Хушбахтона, соли 2015 тариқи Маркази миллии тестӣ ба Донишгоҳи давлатии омӯзгории Тоҷикистон ба номи Садриддин Айнӣ ва ихтисоси таҳсилоти томактабӣ дохил шуда, онро соли 2020 бо муваффақият хатм намудам”.

Шукрона аз давраи донишҷӯӣ ба фаъолияти мураббигӣ оғоз карду ба кори дӯстдоштааш пардохт. Нахуст аз соли 2019 то соли 2022 дар Муассисаи давлатии таҳсилоти томактабӣ - ширхоргоҳ-кӯдакистони №127-и ноҳияи Фирдавсӣ ва баъдан аз соли 2022 то ҳол дар Муассисаи таҳсилоти томактабии №119-и ноҳияи Фирдавсӣ кору фаъолият дорад. Барои ӯ бо кӯдакон кор кардан, хеле шавқовару ҷолиб аст.

- Бешак, ҳамаи мо кӯдаконро дӯст медорем. Чун онҳо бо шухиву бозӣ ва хандаҳои зебову дилҳои софу бекинаи худ дунёи моро зеботар месозанд. Мо, мураббиён хислатҳои онҳоро омӯхтаву вобаста ба он рафтор мекунем. Бароям бо кӯдакон кор кардан, ҳавасангез аст. Аз касби интихобкардаи худ розияму ифтихор дорам, – иброз медорад ӯ.

Ӯ аз субҳ то бегоҳ ҳамроҳи кӯдакон машғулиятҳои гуногун мегузаронад. Ва аз рӯи ҷадвали машғулиятҳои рӯзона ба таълиму тарбияи ин насли ояндадор банд аст. Худи ӯ дар мавриди машғулиятҳояш чунин мегӯяд:

“Дар як ҳафта то 15 машғулият мегузаронам. Барои мисол, рӯзи чоршанбе дар дарси инкишофи нутқ мо тезгӯяк, чистон, зарбулмасалу пандҳо ва инчунин дастурҳои методиро барои инкишофи нутқ мегузарем. Баъдан дар дарси тарбияи ҷисмонӣ ба навъҳои гуногуни варзиш машғул мешавем ва барояшон дар мавриди манфиатҳои он мегӯем, то кӯдакон ба ин васила аз хурдӣ ба варзиш таваҷҷуҳ дош-та бошанду дӯстдори он бошанд. Ҳамчунин, машғулияти дигари шавқоварамон дар ин рӯз расмкашӣ мебошад. Ин дарсест, ки аксари хурдтаракон меписанданд. Ва аз сӯйи дигар дарсест, ки имкон медиҳад, онҳо маҳорати расмкашии худро сайқал диҳанд. Ҳар машғулият 25 ё 30 дақиқа давом мекунад”.

Ягона орзуи ӯ ҷомаи амал пӯшиду муррабӣ шуд. Акнун барои пешрафту рушд дар ҷодаи худ талош менамояд. Ин аст, ки онҳо аллакай натиҷа дода истодааст. Яке аз онҳо мушарраф гаштан ба унвони “Аълочии маориф ва илми Ҷумҳурии Тоҷикистон” дар соли 2023 буд. Ӯ он рӯзро яке аз беҳтарин лаҳзаҳои зиндагии худ унвон мекунад.

Бояд гуфт, ки ин муваффақият пас аз ғолиби озмуни ҷумҳуриявии “Мураббии сол - 2023” гаштан ба ӯ даст дод. Ӯ бо иштироки фаъолона ва нишон додани маҳорати баланд сазовори ҷойи якум гардид.

Барои ҳавасмандии чунин нафарон қаблан аз тарафи Вазорати маориф ва илми кишвар 10 ҳазор сомонӣ ва аз тарафи ноҳияи Фирдавсӣ 10 ҳазор сомонии дигар тақдим гардида буд. Ҳамчунин, санаи 20 апрели соли ҷорӣ аз тарафи Мақомоти иҷроияи ҳокимияти давлатии шаҳри Душанбе дар арафаи Рӯзи пойтахти Ҷумҳурии Тоҷикистон ба маблағи 10 ҳазор сомонӣ қадрдонӣ шуд.

- Баргузории чунин озмунҳо дар баланд бардоштани мақоми мураббӣ, сатҳу сифати таълиму тарбияи томактабӣ ва нақши мураббиён дар рушди ҷомеаи имрӯза ба манфиат хоҳад буд. Ман аз чунин дастгириҳои давлату Ҳукумати кишвар бисёр миннатдор ҳастам. Ин ҳама мо, ҷавононро руҳбаланд месозад, то бо азму талоши бештар заҳмат кашем. Ман миннатдориии худро ба ташкилкунандагони ин озмун мерасонам, - гуфт Шукрона.

Шукрона дар мавриди иштирокаш дар озмуни мазкур чунин мегӯяд:

- Дар ин озмун иштирок намудаву хушбахтона ба даврҳои дигар низ роҳ ёфтам. Дар даврҳои ноҳиявию шаҳрӣ сазовори ҷойи якум гаштам. Дар даври ҷумҳуриявии озмун мо 5 нафар мураббиҳо аз тамоми минтақаҳои кишвар иштирок намудем. Ин давр 3 рӯз давом намуд. Дар ин муддат аз ҷониби аъзои ҳакамон саволҳову шартҳо пешниҳод мешуд ва мо ба онҳо ҷавоб медодему шартҳоро иҷро менамудем. Ҳангоми интихоби ғолиб дониш, маҳорати касбӣ, қобилияти ташкилии онҳо ба инобат гирифта мешуд. Ҳамин тавр, аз рӯи холҳо ва хулосаи ҳакамон ғолиби озмун дониста шудам.

Қаҳрамони мо занест хушбахт, модари ду писари дӯстрӯ ва зиндагии шоиста. Ҷавондухтарест дар роҳи фатҳи қуллаҳои мурод. Аз устодаш Маърифат Ризоева, ки нозукиҳои ин ҷодаро ба ӯ омӯхтааст, миннатдор будаву сипоси беандоза ба ӯ мегӯяд.

Қаҳрамони мо бо хислатҳои неки инсонӣ миёни ҳамкасбон шинохта шудааст. Ҳамагон ӯро ба унвони нафари серталошу боғайрат ва меҳнатдӯсту дӯстдори ҷодаи худ мешиносанд. Тавре яке аз ҳамкоронаш Лайло Холова мегӯяд: “Ӯ мураббиест ботаҷриба, фаъол ва масъулиятшинос. Дар чорабиниҳои муассиса ва берун аз он иштироки фаъолона дорад. Духтараки оромтабиату кӯмакрасони дигарон аст. Мушкиле дар ҷойи кор пеш ояд, бо маслиҳату ҳамдигарфаҳмӣ онро ҳал месозад”.

Ӯ роҳи худро идома додан мехоҳад, то ба зинаҳои аз ин ҳам баланди муваффақият бирасад.

Гулафшон КАРИМОВА, “ҶТ”