7 июл сардори Саридораи геологияи назди Ҳукумати Ҷумҳурии Тоҷикистон Оймуҳаммадзода Илҳомҷон Султон зимни нишасти матбуотӣ ба хабарнигорон иттилоъ дод, ки дар ин давра аз ҳисоби маблағҳои буҷети давлатӣ корҳои омӯзиши геологӣ аз рӯи 30 лоиҳаи таҳқиқотӣ ва 7 лоиҳаи нигоҳдорӣ ба маблағи 8787,5 ҳазор сомонӣ дар объектҳои металҳои сиёҳ, ранга, қимматбаҳо ва нодир, сангҳои худҷило ва ороишӣ, инчунин дар самтҳои гидрогеология, геологияи муҳандисӣ ва геоэкология ба роҳ монда шуданд.

Гуфта шуд, корҳои шартномавӣ ва пудратӣ аз рӯи 140 лоиҳа ба маблағи 15 миллиону 401,6 ҳазор сомонӣ ба анҷом расонида шуданд. Дар маҷмӯъ, ҳаҷми корҳои иҷрошуда бо усули хоҷагидорӣ 24 189,1 ҳазор сомониро ташкил дода, нисбат ба ҳамин давраи соли 2025 10 126,4 ҳазор сомонӣ зиёд мебошад. Суръати афзоиши иҷрои корҳо 172 фоизро ташкил дод.

Таъкид гардид, ки тибқи лоиҳаи “Хадамоти давлатии мушоҳидаи равандҳои экзогении геологӣ” дар давраи ҳисоботӣ дар 55 деҳа, маҳалла ва шаҳраки ҳудуди шаҳру ноҳияҳои тобеи ҷумҳурӣ, инчунин вилоятҳои Хатлон ва Суғд тадқиқоти муҳандисию геологӣ гузаронида шуд. Дар натиҷа барои кӯчонидани 142 хоҷагӣ аз минтақаҳои хавфнок тавсия пешниҳод гардид.

Малика МУҚАДАМОВА, “ҶТ”