Дар Паёми худ ба Маҷлиси Олӣ Пешвои миллат муҳтарам Эмомалӣ Раҳмон сиёсати давлатии ҷавононро дар меҳвари таваҷҷуҳ қарор дода, таъкид намуданд, ки “ҷавонони мо неруи асосии пешбарандаи ҷомеа мебошанд ва мо бо ҳисси баланди миллӣ, худшиносиву худогоҳӣ ва ватандӯстиву ватанпарастии онҳо ифтихор мекунем”.

Маълумотҳои оморӣ собитгари он аст, ки 70 дарсади аҳолии Тоҷикистонро ҷавонон ташкил медиҳанд. Ин қишри ояндасози давлат пайваста аз таваҷҷуҳ ва ғамхориҳои Президенти мамлакат муҳтарам Эмомалӣ Раҳмон бархӯрдоранд. Бо ифтихор метавон гуфт, ки дар ҳар суҳбату мулоқот ва суханрониҳои худ Сарвари давлат ба ҷавонон такя мекунанд ва онҳоро неруи пешбарандаи ҷомеа медонанд.

Дар натиҷаи амалӣ гардидани барномаҳои соҳавии давлатӣ шароит фароҳам гардид, ки ҷавонон дар тамоми соҳаҳо фаъолият намоянд, ба варзиш машғул шаванд ва орзуҳои худро қадам ба қадам амалӣ намоянд. Дар зимн вобаста ба дастовардҳои ҷавонони ноҳияи Бобоҷон Ғафуров суҳбате доштем, бо Баҳриддин Баҳодурзода, мудири бахши кор бо ҷавонон ва варзиши ноҳия, ки фишурдаи суҳбат ба хонандагон пешниҳод мегардад.

- Ноҳияи Бобоҷон Ғафуров аз калонтарин навоҳӣ дар вилояти Суғд ба шумор меравад. Имрӯз барои ҷавонон кадом шароити мусоид фароҳам оварда шудааст?

- Имрӯз дар ноҳияи Бобоҷон Ғафуров бо дастгирии Ҳукумати Ҷумҳурии Тоҷикистон ва таваҷҷуҳи доимии Пешвои миллат муҳтарам Эмомалӣ Раҳмон барои ҷавонон шароити мусоиди таҳсил, рушди маънавӣ, машғул шудан ба варзиш ва иштироки фаъол дар ҳаёти ҷамъиятӣ фароҳам оварда шудааст. Фаъолияти марказҳои ҷавонон, мактабҳои варзишӣ, майдончаҳои варзишӣ ва чорабиниҳои гуногуни маърифатӣ ба рушди ҳамаҷонибаи ҷавонон мусоидат менамояд.

Бояд бигӯям, ки дар ноҳияи Бобоҷон Ғафуров 140 577 нафар ҷавонон умр ба сар мебаранд. Дар Маркази ҷавонони ноҳия маҳфили “Пайравони Пешвои миллат” амал мекунад. Бо мақсади омӯзиши забонҳои хориҷӣ курси омӯзиши забони англисӣ ройгон ба роҳ монда шудааст. Дар самти ҳавасманд намудани ҷавонон, дастгирии варзишгарон Мақомоти иҷроияи ҳокимияти давлатии ноҳияи Бобоҷон Ғафуров дар заминаи дастуру супоришҳои Пешвои миллат ҳамеша тадбирҳои муассир меандешад. Метавон гуфт, ки ҷавонони ноҳия бо шукргузорӣ аз фазои орому осудаи ватан дар амалӣ шудани сиёсати пешгирифтаи Ҳукумати мамлакат саҳм мегузоранд.

- Дар ноҳия бо мақсади иҷрои дастуру супоришҳои Роҳбарияти олии давлату Ҳукумат дар самти бедор намудани ҳисси ватандӯстӣ ва ифтихори миллӣ дар замири ҷавонон кадом корҳои мушаххас анҷом дода шуданд?

- Дуруст аст, ки дар замони бархӯрди тамаддунҳо, тағйирёбии авзои ҷаҳон Пешвои миллати ғамхору дилсӯзи мо ҳамеша масъалаи худшиносиро дар маркази таваҷҷуҳ қарор медиҳанд. Мо масъулини соҳаро вазифадор мекунанд, ки дар фаъолияти худ бештар ба ин масъала аҳамияти хосса диҳем. Мо ҳамеша ҳидоятҳои раҳнамунсози Сарвари давлатро сармашқи кору фаъолият қарор медиҳем ва ҳамин аст, ки дастоварди ҷавонони мо сол аз сол бештар мешавад.

Ташаккули тафаккури миллӣ бо роҳи тарбия намудани ҷавонон дар самти ҳифзи бештари манфиатҳои миллӣ ва дар онҳо тарбия намудани ҳисси оштинопазир ба терроризму экстремизм, коррупсия, нашъаҷалобӣ ва дигар намуди ҷинояткорӣ яке аз самтҳои афзалиятноки соҳаи кор бо ҷавонон ба ҳисоб рафта, дар давраи ҳисоботӣ чорабиниҳои гуногун ба роҳ монда шуд.
Бо мақсади тақвияти худшиносии миллӣ ва бедор намудани ҳисси ватандӯстӣ дар байни ҷавонон дар ноҳия вохӯриҳо бо собиқадорон, хизматчиёни ҳарбӣ, шахсиятҳои намунавӣ, маҳфилҳои сиёсиву маърифатӣ, дарсҳои ватандӯстӣ ва конфронсҳо баргузор гардиданд. Ин тадбирҳо ба баланд бардоштани маърифати сиёсӣ ва ифтихори миллӣ мусоидат мекунад. Бо ҳамин мақсад, дар самти худшиносиву худогоҳӣ ва тарбияи ватандӯстии шаҳрвандон 122 мулоқоту вохӯрӣ бо хонандагон ва волидайни онҳо, 130 маротиба чорабинии гуногунро роҳандозӣ намудем. Ин поёни кор набуда, албатта дар ин ҷода дар соли равон нақшаҳои нав рӯйи даст гирифта шуданд.

- Як самти фаъолияти шумо бевосита ба варзиш алоқаманд аст. Ҳоло дар ноҳия ба рушди соҳаи варзиш то чӣ андоза таваҷҷуҳ равона шудааст?

- Воқеан варзиш кафили солимӣ ва омили муттаҳидкунанда ба шумор рафта, варзишгарони тоҷик давлату миллатро дар арсаи ҷаҳон шоиста муаррифӣ мекунанд. Аз ин ҷост, ки рушди соҳаи варзиш яке аз самтҳои афзалиятноки сиёсати давлатӣ қарор гирифтааст. Солҳои охир дар ноҳияи Бобоҷон Ғафуров ба рудши соҳаи варзиш таваҷҷуҳи бештар равона гардида, бо бунёди иншооти нав шароити машқу тамрин ва тарғиби тарзи ҳаёти солим рӯ ба беҳбудӣ ниҳодааст. Ҳоло дар ҳудуди ноҳия 181 майдончаи варзишӣ, 67 толори машқ, 3 мактаби варзишӣ, 5 варзишгоҳ мавҷуд мебошад, ки дар ин иншоот пайваста мусобиқаҳои гуногуни сатҳи ноҳиявӣ, вилоятӣ ва ҷумҳуриявӣ баргузор мешаванд.

- Ҷавонону наврасони ноҳия ба кадом риштаи варзиш таваҷҷуҳ доранд? Умуман, дастоварди варзишгаронро дар соли 2025 чӣ гуна арзёбӣ мекунед?

- Ҷавонону наврасони ноҳия бештар ба футбол, гӯштини миллӣ, гӯштини юнонию румӣ, бокс, таэквондо, волейбол ва баскетбол машғул мешаванд. Дар соли 2025 варзишгарони ноҳия дар мусобиқаҳои сатҳҳои гуногун фаъолона иштирок намуда, соҳиби ҷойҳои ифтихорӣ гардиданд, ки ин нишондиҳандаи рушди устувори соҳаи варзиш мебошад.

Ҳаминро бояд гуфт, ки ҷиҳати интихоби варзишгарон барои иштирок дар мусобиқаҳои вилоятӣ, ҷумҳуриявӣ ва чемпионатҳои Ҷумҳурии Тоҷикистон дар ноҳия 116 мусобиқаи касбӣ аз рӯи намудҳои футбол, волейбол, гӯштини тарзи озод, каратэ-до, бадминтон, муай-тай, баскетбол, таэквандо-ВТ ва варзиши сабук, тенниси рӯи миз, шашка ва шоҳмот бо фарогирии 1101 варзишгар (181 бонувон) ташкил ва гузаронида шуд. Дар натиҷа, аз ҳисоби ғолибон ва ҷоизадорони мусобиқаҳо, дастаи мунтахаби ноҳия дар ҳайати 454 нафар варзишгар муайян гардида, дар 46 мусобиқаи ҷумҳуриявӣ ва чемпионатҳои Ҷумҳурии Тоҷикистон иштирок намуданд ва ба гирифтани 56 медали тилло, 89 медали нуқра ва 98 медали биринҷӣ мушарраф гардиданд.

- Дар мактабҳои варзишии ноҳия шароити машқу тамрин дар кадом сатҳ қарор дорад? Дар фасли зимистон варзишгарон имкон доранд, ки ба машқу тамрин машғул шаванд?

- Дар аксари мактабҳои варзишии ноҳия шароити қаноатбахши машқу тамрин фароҳам оварда шудааст. Толорҳои пӯшида ва инфрасохтори мавҷуда имкон медиҳанд, ки варзишгарон дар фасли зимис-тон низ ба машқу тамрин мунтазам машғул шаванд. Дар ин замина, бо мақсади ҷалби наврасону ҷавонон ба варзиш дар ноҳия 3 мактаби варзишӣ мавҷуд аст. Дар мактабҳои варзишӣ 90 гурӯҳ бо фарогирии 1116 машқварзони наврасу ҷавон амал намуда, ҳамарӯза аз рӯи 16 намуди варзиш ба машқу тамрин фаро гирифта мешаванд.

- Тавре, ки маълум аст, ноҳияи Бобоҷон Ғафуров дар хатти сарҳад қарор дорад. Соли гузашта дар самти ташкили мусобиқаҳои дӯстона бо ҷавонони кишвари ҳамсоя таҷриба пайдо шуд?

- Як нуктаро бояд ёдрас шавам, ки дар Паёми Пешвои миллат муҳтарам Эмомалӣ Раҳмон ба Маҷлиси Олӣ таъкид гардид, ки “ҳалли пурраи масъалаҳои сарҳадии тайи беш аз сад соли охир ҳалношудаи байни ду давлат – Ҷумҳурии Тоҷикистон ва Ҷумҳурии Қирғизистон бо имзои шартнома дар бораи муайян кардани хатти сарҳади давлатӣ рӯйдоди таърихӣ мебошад”. Ин тадбири муҳиму таърихӣ сокинони ноҳияи Бобоҷон Ғафуров, бахусус ҷавононро хеле шод намуд. Акнун имкон пайдо гардид, ки бо ҳамсолони худ рафту омад намоянд, таҷриба андӯзанд ва риштаҳои дӯстиро мустаҳкам намоянд. Зеро ойини ҳамсоядорӣ дар фарҳанги миллати бузурги мо ҷойгоҳи хос дорад.

Соли гузашта дар ноҳия мусобиқаҳои варзишии дӯстона бо иштироки ҷавонони минтақаҳои сарҳадии кишвари ҳамсоя баргузор гардиданд. Ин тадбирҳо барои таҳкими дӯстӣ, ҳамдигарфаҳмӣ ва рушди муносибатҳои нек байни ҷавонон аҳамияти муҳим доранд.

- Имсол 35-солагии Истиқлоли давлатӣ таҷлил мегардад. Дар ноҳия то ба имрӯз ба ифтихори ин ҷашни фархундаи миллӣ ҷанд иншооти соҳаи ҷавонон ва варзиш сохта ба истифода дода шуд?

- Бо мақсади таҷлили шоис-таи ҷашни 35-солагии Истиқлоли давлатӣ дар ҳамаи гӯшаву канори Тоҷикистони соҳибистиқлол корҳои азими созандагӣ рӯз аз рӯз вусъат мегирад. Дар доираи омодагиҳо ба ин ҷашни фархундаи миллӣ дар ноҳияи Бобоҷон Ғафуров як қатор майдончаҳои варзишӣ, толорҳои машқ ва дигар иншооти соҳаи ҷавонон ва варзиш сохта ба истифода дода шуданд.

Қобили қайд аст, ки охирҳои соли 2024 бо иштироки Пешвои миллат муҳтарам Эмомалӣ Раҳмон дар деҳоти Исфисори ноҳия Муассисаи давлатии мактаби махсуси варзишӣ оид ба футбол мавриди баҳрабардорӣ қарор гирифта буд. Ин муассиса аз варзишгоҳи бузург бо 7000 ҷойи нишаст, майдончаи варзишӣ, ҳуҷраҳои корӣ, либосивазкунӣ ва маҷлисгоҳ барои 40 нафар иборат аст.

Ба ҳамин монанд, бо хушнудӣ метавон гуфт, ки бо дастгириҳои пайвастаи Ҳукумати Ҷумҳурии Тоҷикистон, Мақомоти иҷроияи ҳокимияти давлатии вилояти Суғд, Мақомоти иҷроияи ҳокимияти давлатии ноҳия ва саҳми соҳибкорону саховатмандон ҳар сол иншооти соҳаи ҷавонон ва варзиш мавриди истифода қарор мегирад, ки дар самти рушд ва оммавияти варзиш, ташаккули маънавии наврасону ҷавонон заминаи мусоид фароҳам меоварад.

- Дар замони имрӯз, ки падидаҳои номатлуб бештар доман паҳн намуда, ба мафкураи ҷавонон таъсири бад мегузоранд, чӣ бояд кард, то насли ҷавон аз ҳама гуна хавфу хатар эмин бошад?

- Тақвияти корҳои тарбиявӣ ва маърифатӣ, баланд бардоштани маърифати ҳуқуқӣ, сиёсӣ ва фарҳангии ҷавонон, ҷалби онҳо ба варзиш, илм ва фаъолияти ҷамъиятӣ метавонад ҷавононро аз ҳар гуна таъсири манфӣ эмин нигоҳ дорад.

Дар робита ба ин масъала Пешвои миллат муҳтарам Эмомалӣ Раҳмон дар Паёми худ ба Маҷлиси Олӣ иброз доштанд, ки “вазъи мураккаб дар манотиқи гуногуни дунё, шиддат гирифтани рақобатҳои геосиёсӣ ва геоиқтисодӣ ба хотири аз нав тақсим кардани ҷаҳон, мавҷи нави “ҷанги сард”, яроқнокшавии бошитоб, заиф гардидани меъёрҳои ҳуқуқи байналмилалӣ ва дигар равандҳои пуртазод дар арсаи байналмилалӣ ҳамоно мояи нигаронӣ боқӣ мемонад. Дар чунин шароит моро зарур аст, ки дар баробари иштироки фаъол дар равандҳои глобалӣ, дар ҳамбастагӣ бо ҷомеаи ҷаҳонӣ ба саъю талошҳоямон барои расидан ба ҳадафҳои созанда – пойдории сулҳу субот ва таъмини амнияти фарогир тақвият бахшем”.

Чунин мешуморам, ки тарбия ва ба камол расонидани насли ватандӯсту худогоҳ вазифаи муқаддаси ҳар як фард ба ҳисоб меравад.

Субҳиддин ҚОДИРОВ, “ҶТ”