Тибқи нақшаи муштараки Мақомоти иҷроияи ҳокимияти давлатии шаҳри Бӯстон дар ҳамкорӣ бо мақомоти ҳифзи ҳуқуқ дар театри давлатии драма ва мазҳакаи русии ба номи А.С.Пушкини шаҳр бо хонандагон ва волидони синфҳои болоии гимназияи №2 мулоқот доир гардид.

Дар мулоқот мудири шуъбаи рушди иҷтимоӣ ва робита бо ҷомеаи дастгоҳи раиси шаҳри Бӯстон Мамнур Нурзода, мудири бахши кор бо ҷавонон ва варзиши шаҳр Хусравшоҳ Исмоилзода, мудири бахши дин, танзими анъана ва ҷашну маросим Бахтовар Ҷумаев, нозири калони шуъбаи вазорати корҳои дохилии Ҷумҳурии Тоҷикистон дар шаҳри Бӯстон Абдусаид Саидзода ширкат намуданд.

Иштирокдорон вобаста ба масъалаҳои таъмини иҷрои дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, саҳмгузорӣ ба истиқболи сазовори 30-солагии Истиқлолияти давлатии Ҷумҳурии Тоҷикистон, масъалаҳои пешгирии шомилшавии шаҳрвандон ба ҳизбу ҳаракатҳои ғайриқонунӣ, муқовимат бо коррупсия, таъмини иҷрои Қонунҳои Ҷумҳурии Тоҷикистон "Дар бораи танзими анъана ва ҷашну маросим дар Ҷумҳурии Тоҷикистон" ва "Дар бораи масъулияти падару модар дар таълиму тарбияи фарзанд" суханронӣ намуданд.

Аз сокинон ва ҷавонон даъват ба амал оварда шуд, ки дар вусъати корҳои ободониву созандагӣ саҳмгузорӣ намуда, дар мубориза бар зидди ҳама гуна омилҳои номатлуб ҳамкориро бо мақомоти иҷроияи ҳокимияти давлатии шаҳри Бӯстон ва мақомоти ҳифзи ҳуқуқ тақвият бахшанд.