20 январ мулоқоти Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо мақсади таҳкими ҳамкориҳо бо ҷомеаи блогерӣ, истифодаи самараноки шабакаҳои иҷтимоӣ дар самти тарғиби сиёсати давлатии ҷавонон ва варзиш, инчунин инъикоси дастовардҳои соҳа таҳти унвони “Ҷавонон, Паём ва ҳифзи манфиатҳои миллӣ” доир шуд.

Мулоқот дар толори маҷлисгоҳи Кумита баргузор гардида, дар он ҳамзамон Давлат Сафарзода, муовини вазири фарҳанги Ҷумҳурии Тоҷикистон, Бахтиёр Маҷидов, роҳбари Ассотсиатсияи блогерони Тоҷикистон, инчунин намояндаи Барномаи рушди Созмони Милали Муттаҳид иштирок намуда, вобаста ба мавзӯи вохӯрӣ андеша ва пешниҳодҳои худро баён намуданд.

Тибқи иттилои маркази таҳлил ва иттилооти Кумита, зимни баромадҳо таъкид шуд, ки хизматҳои шоистаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, инчунин дастовардҳои даврони соҳибистиқлолӣ бояд пайваста ҳифз, муаррифӣ ва дар фазои иттилоотӣ ба таври васеъ тарғиб карда шаванд.
Раиси Кумита дар суханронии худ ба аҳаммияти фаъолияти иттилоотӣ дар фазои рақамӣ таъкид намуда, иброз дошт, ки ҳамкории мутақобила бо блогерон метавонад дар ташаккули афкори солими ҷомеа, бахусус дар миёни ҷавонон саҳми назаррас гузорад.

Ҳамчунин, масъалаҳои нақши блогерон дар баланд бардоштани маърифати ҳуқуқӣ ва сиёсӣ миёни ҷавонон, тарғиби тарзи ҳаёти солим, рушди соҳаи варзиш ва пешгирии падидаҳои номатлуби иҷтимоӣ мавриди баррасӣ қарор гирифтанд.

Дар ҷараёни мулоқот иштирокчиён вобаста ба тақвияти ҳамкориҳо, татбиқи ташаббусҳои муштарак ва густариши фазои иттилоотии мусбат мубодилаи афкор намуда, омодагии худро ҷиҳати идомаи ҳамкориҳои судманд изҳор доштанд.

Дар охир чанде аз блогерони фаъол барои саҳмгузорӣ дар тарғиби видеороликҳои ватандӯстона бо туҳфаҳои хотиравӣ қадрдонӣ шуданд.

Б. ҚАЮМӢ, “ҶТ”