Имрӯз 18 феврал, дар меҳмонхонаи “Crowne Plaza” – и шаҳри Душанбе маросими ҷоизасупории соҳаи тарбияи ҷисмонӣ ва варзиш дар соли 2025 баргузор гардид.Дар маросими ҷоизасупорӣ варзишгарони бомаҳорат ва шинохтаи кишвар, муррабиён, рӯзноманигорони самти варзиш бо маблағҳои пулӣ, диплом ва туҳфаҳо қадрдонӣ гардиданд.

Дар оғози чорабинӣ Дилрабо Мансурӣ, муовини Сарвазири кишвар ва Гулаҳмадзода Зулфиқор, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон суханронӣ намуданд. Дар идома 67 варзишгар ва мураббиёни онҳо бо Ҷоизаи Президенти Ҷумҳурии Тоҷикистон барои ғолибон ва ҷоизадорони мусобиқаҳои байналмилалии варзишӣ ва мураббиёни онҳо дар ҳаҷми 2 миллиону 40 ҳазор сомонӣ, сарфароз гардонида шуданд.

Дар маросим, ҳамчунин, ғолибони озмуни ҷоизаи “Варзишгари беҳтарини сол”, “Мураббии беҳтарини сол”, “Мактаби варзишии беҳтарини сол”, “Беҳтарин федератсияи варзишии сол”, “Беҳтарин иншооти варзишии сол”, “Беҳтарин шаҳри варзишии сол”, “Беҳтарин воситаи ахбори омма дар соҳаи тарбияи ҷисмонӣ ва варзиш”, “Беҳтарин сохтори маҳаллӣ дар соҳаи тарбияи ҷисмонӣ ва варзиш”, “Шореҳи беҳтарини соҳаи варзиш” ва “Варзишгарнавраси умедбахш” дар соли 2025 муайян ва қадрдонӣ карда шуданд.

Рустам САМИЕВ, “ҶТ”