Аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо мақсади арҷгузорӣ ба мақому манзалати Зан-Модар ва дар арафаи Рӯзи Модар таҳти унвони “Ҳикмати Модар” аксияи ҷумҳуриявӣ доир карда шуд.

Дар ин хусус аз Маркази таҳлил ва иттилооти Кумита хабар доданд.

Гуфта мешавад, ки дар доираи ин иқдом гулдухтарони Кумита ба аёдати собиқадорон ва бонувони фаъолу хизматнишондодаи соҳаҳои гуногун рафта, ба онҳо ҳамчун рамзи эҳтиром ва армуғони баҳорӣ либоси миллии тоҷикӣ - чаканро бо тамоми унсурҳояш тақдим намуданд.
Ба гуфтаи масъулин мақсад аз тақдими либоси миллӣ ба бонувон эҳёи суннатҳои неки миллӣ ва тарғиби фарҳанги миллӣ миёни ҷомеа буда, он ҳамчун нишони арҷгузорӣ ба фарҳанги миллӣ ва гиромидошти нақши занону модарон дар кишвар амалӣ гардид.

Иброз мешавад, ки либоси миллӣ муаррифгари таърих, тамаддун ва ҳувияти ҳар як халқу миллат ба ҳисоб рафта, аз ҷумла соли 2018 чакани тоҷикӣ ба Феҳристи мероси фарҳангии ғайримоддии башарият ЮНЕСКО ворид гардидаст.

Гулафшон КАРИМОВА, “ҶТ”