Гурӯҳҳои кории ҳайатҳои ҳукумати Тоҷикистон ва Узбекистон оид ба аломатгузории сарҳади давлатии Тоҷикистон ва Узбекистон музокирот баргузор кардаанд.

Дар ин бора Вазорати корҳои хориҷии Тоҷикистон иттилоъ медиҳад.

Тибқи иттилои манбаъ, аз 29 апрел то 4 майи соли ҷорӣ дар шаҳри Душанбе вохӯрии навбатии гурӯҳҳои кории Комиссияи муштараки демаркатсионии Тоҷикистону Узбекистон баргузор гардид.

- Зимни вохӯрӣ раванди корҳои демаркатсионӣ муҳокима гардида, пешниҳодҳои муштарак оид ба хатти лоиҳавии демаркатсионии сарҳади Тоҷикистону Узбекистон омода шуданд, - зикр менамояд манбаъ.

Гуфта мешавад, ки вохӯрӣ дар руҳияи ҳампаймонӣ ва фазои ҳамдигарфаҳмӣ гузашта, аз натиҷаи вохӯрӣ Протоколи дахлдор ба имзо расид. Вохӯрии навбатӣ дар Ҷумҳурии Узбекистон доир мегардад.

Ёдовар мешавем, ки дарозии марзи байни Тоҷикистон ва Узбекистон 1,33 ҳазор километрро ташкил медиҳад. Аз ин 105 километр сарҳади дарё ва 1,227 сарҳади хушкӣ мебошанд.

Пас аз пошхӯрии Иттиҳоди Шуравӣ тақрибан 20 дарсади хати сарҳади давлатии Тоҷикистону Узбекистон тақсимнашаванда боқӣ монд.