Сенат ё маҷлиси болоии парлумони Қазоқистон аҳдномаи шарикии стратегиро бо Тоҷикистон тасвиб кард. Он миёни Тоҷикистону Қазоқистон 14 сентябри соли гузашта дар ҷараёни сафари расмии Нурсултон Назарбоев ба Душанбе имзо шуда буд.

Дафтари матбуоти Сенати Қазоқистон бо нашри иттилоияи расмӣ гуфтааст, ин аҳднома ҳар ду тарафро уҳдадор мекунад, аз истифодаи таҳдиду зӯрӣ зидди якдигар худдорӣ карда, бо ҷониби сеюм, ки ба амнияту қаламрав ва истиқлолашон таҳдид дорад, шартномаи ҳамкорӣ имзо накунанд.

Муовини вазири корҳои хориҷии Қазоқистон Мухтор Тлеубердӣ ҳангоми тасвиби ин тарҳ гуфтааст, ки аҳдномаи шарикии стратегӣ ба рушди ҳамкориҳои Тоҷикистону Қазоқистон мусоидат хоҳад кард.

"Дар пасманзари ҳаводисе, ки дар Шарқи Наздик ҷараён дорад, инчунин вазъи Афғонистон, фаъолшавии созмонҳои террористӣ, Қазоқистон ҳарчи бештар манфиатдор аст, ки амният дар Осиёи Марказӣ, бахусус дар Тоҷикистон, ки ҳаммарз бо Афғонистон аст, устувор бошад", - гуфтааст Мухтор Тлеубердӣ.

Порлумони Тоҷикистон моҳи декабри соли гузашта ин ҳуҷҷатро тасвиб карда буд.