Имрӯз бахшида ба Рӯзи Президент дар Қасри фарҳанги ноҳияи Рӯшони ВМКБ бо иштироки раиси ноҳия Илҳом Аҳмадзода, намояндагони идораву корхонаҳо, афсарону сарбозон, ҷавонон ва варзишгарон чорабинии бошукуҳ баргузор гардид.

Дар ин бора аз Бахши кор бо ҷавонон ва варзиши ноҳияи Рӯшон хабар доданд.

Гуфта шуд, баъди садо додани Суруди миллӣ раиси ноҳия ҷамъомади тантанавиро ифтитоҳ намуда, дар суханронии хеш саҳми беназири Пешвои миллат муҳтарам Эмомалӣ Раҳмонро дар таҳкими истиқлоли давлатию ваҳдати миллӣ, рушду нумуи ҳаёти иқтисодию иҷтимоии кишвар назаррас арзёбӣ кард .

Ҳамчунин, гуфта шуд, ки маҳз ҷоннисориву қаҳрамониҳо ва аз худ гузаштанҳои Пешвои миллат муҳтарам Эмомалӣ Раҳмон буд, ки Тоҷикистон ба ин рӯзҳои нек расид.

Сипас, ба хотири ин рӯз чанд нафар омӯзгори макотиби миёнаи ноҳия бо нишони Аълочии маориф ва илм ва кормандони фаъоли идораву муассисаҳо бо ифтихорномаи раиси ноҳия қадрдонӣ шуданд.

Наҷиба МУРОДБЕКОВА, “ҶТ”