Қосим-Жомарт Токаев, Президенти Ҷумҳурии Қазоқистон 22-23 август бо даъвати Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо сафари давлатӣ ба Ҷумҳурии Тоҷикистон ташриф меорад.

Дар ин хусус Вазорати корҳои хориҷии кишвар иттилоъ медиҳад.

Тибқи иттилои манбаъ, дар доираи сафар бо иштироки ҳайатҳои ҳукуматӣ музокироти сатҳи олии Тоҷикистон ва Қазоқистон дар шакли маҳдуд ва васеъ доир мешавад.

-Барои имзо бастаи калони ҳуҷҷатҳо омода карда шудааст, ки ҳуҷҷати асосии онҳо Шартнома оид ба муносибатҳои иттифоқӣ хоҳад буд,-менависад манбаъ.

Гуфта мешавад, ки роҳбарони давлатҳо ҳамчунин дар консерти тантанавӣ ба муносибати ифтитоҳи Рӯзҳои фарҳанги Қазоқистон дар Тоҷикистон иштирок намуда, ҳамчунин дар доираи барномаи сафар мулоқоти Президенти Ҷумҳурии Қазоқистон бо Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода ва Сарвазири Ҷумҳурии Тоҷикистон Қоҳир Расулзода пешбинӣ шудааст.

Инчунин зикр гардид, ки дар чаҳорчӯби сафари давлатӣ дар пойтахти Тоҷикистон чунин чорабиниҳои канорӣ, аз қабили форуми тиҷоратӣ, конференсияи олимон, форуми занон, форуми ҷавонон, рӯзҳои синамои қазоқ, намоишгоҳи санъати тасвирӣ ва ҳунарҳои мардумии Қазоқистон, маросими ифтитоҳи нимпайкараи Абай Қунанбоев дар шаҳри Душанбе, инчунин консертҳо дар шаҳрҳои Бохтар ва Хуҷанд баргузор мешаванд.