Абдураҳим Қаҳҳоров, раиси Шӯрои амнияти Тоҷикистон бо ҳамтои русаш Николай Патрушев, ки дар доираи як сафар вориди Душанбе шудааст, масъалаи муборизаи муштарак зидди тероризм ва ифротгароиро баррасӣ карданд.

Ба гуфтаи намояндаи Шӯрои амнияти кишвар, ҷонибҳо дар ин мулоқот масъалаҳои марбут ба мубориза бо терроризм ва вазъи амниятии Афғонистонро ба баҳс кашидаанд.

Ин дидори дуюми раҳбарони шӯрои амнияти Русия ва Тоҷикистон дар се моҳи ахир аст. Мулоқоти пешина моҳи июни соли ҷорӣ дар Москва баргузор шуда буд. Он замон Қаҳҳоров ва Патрушев вазъи Осиёи Марказӣ, таҳдидҳо аз Афғонистон, ҳамкориҳои ҳарбию техникии ду кишварро баррасӣ карданд.

Қарор аст, Николай Патрушев, ҳамчунин бо Президенти кишвар Эмомалӣ Раҳмон ва вазири мудофиаи Тоҷикистон Шералӣ Мирзо дидор ва гуфтугӯ кунад.