Қадами мубораки Президенти Ҷумҳурии Тоҷикистон муҳтарам Эмомалӣ Раҳмон ба ВМКБ ҳамеша баракат ва нусрати тоза меорад. Ҳамин аст, ки мардуми меҳмоннавози Бадахшон ҳар як ташрифи Пешвои миллатро бесаброна интизор мешаванд.

Мо дар матлаби мазкур тасмим гирифтем, ки таассуроти чанд сокини ин вилоятро аз ташрифи охирини Сарвари давлат муҳтарам Эмомалӣ Раҳмон ба ВМКБ пурсон шавем.


 Холиса Саидхонова, раиси КИ ҲХДТ дар ноҳияи Рӯшон:

- Сокинони бедордили ВМКБ, махсусан сокинони равшанзамири ноҳияи Рӯшон ҳамеша ташрифи Сарвари давлат муҳтарам Эмомалӣ Раҳмонро бесаброна интизорӣ мекашанд. Зеро қадами мубораки Пешвои миллат ба ин ё он минтақа пеш аз ҳама ободӣ ва файзу баракат меорад. Санаи 12 октябр сокинони ноҳияи Рӯшон Пешвои миллат муҳтарам Эмомалӣ Раҳмонро бо руҳияи болида ва самимияти беандоза истиқбол намуданд. Дар фурудгоҳ меҳмони олиқадрро бо дафу доира ва рақсу суруд, ки дар он муҳаббати сокинон ба Сарвари давлат дида мешавад, пешвоз гирифтанд.

Нахуст, Сарвари давлат майдони Нишони давлатиро, ки дар маркази ноҳия, дар масоҳати 600 метри мураббаъ, дар паҳлуи парчами давлатӣ ҳамчун нишони эҳтирому арҷгузорӣ ба рамзҳои муқаддаси миллӣ бунёд шудааст, ифтитоҳ намуданд. Баъдан аз ҶДММ “Сабзавоти кӯҳистон” боздид карда, ҳамзамон, ба фаъолияти Корхонаи ҶДММ “Неъматҳои Рӯшон”, ки ба коркарди меваю сабзавот машғул мебошад, оғоз бахшиданд. Пас аз кушодашавии ҳамаи ин иншоотҳо ҷавонон ба кори доимӣ ҷалб карда шуданд, ки ин ҳама бо шарофати қадамҳои Пешвои миллат мебошад.

Дар маркази ноҳия бо бардоштани парда аз рӯи лавҳаи рамзӣ бинои хуштарҳу муосири “Маркази инкишофи кӯдакони Шайдо”-ро ифтитоҳ намуданд. Дар ин рӯз хурсандии сокинони ноҳия ва беш аз 120 нафар кӯдак ҳадду канор надошт, зеро маҳз бо иштироки Сарвари давлат барояшон бинои зебову замонавии 3-ошёна ба фаъолият шуруъ намуд.

Сарвари давлат дар тамоми сафарҳои кории худ ба тамоми гӯшаҳои кишвар аз ҳоли ятимону маъюбон хабардор мегарданд. Зимни сафар ба ноҳия дар тарабхонаи “Сафина” вохӯрӣ бо ятимону маъюбони ноҳияҳои Дарвоз, Ванҷ, Шуғнону Рӯшон ба вуқуъ пайваст ва ятимон, ки он рӯзро бесаброна интизор буданд, бо Пешвои ятимпарвар суҳбати озод намуданд. Ба андешаи онҳо суханҳои инсондӯстонаи Пешвои миллат ба зиндагияшон умеди тоза мебахшад. Ҳамчунин, дар ин рӯз дар боғи фарҳангиву фароғатии ноҳия бо фаъолон ва сокинони ноҳия мулоқот намуда, сокинон барои рушду шукуфоии ноҳия ба Пешвои миллат изҳори миннатдорӣ карданд.


Наҷиба Баҳромова, мудири Бахши иқтисоду савдо ва мониторинги Мақомоти иҷроияи ҳокимияти давлатии ноҳияи Рӯшон:

- Сафари кории Пешвои миллат муҳтарам Эмомалӣ Раҳмон дар таърихи 12 октябри соли 2024 ба ноҳияи Рӯшон ин боз шудани як саҳифаи нави зиндагии шоистаи мардуми ноҳия маҳсуб меёбад. Зеро ба истифода додани инфрасохтори зарурии муосир барои зиндагии шоиста мардум замина мегузорад.


Ҷаббор Хуҷаназаров, мудири Бахши рушди иҷтимоӣ ва робита бо ҷомеаи дастгоҳи раиси ВМКБ:

- Имрӯз симои вилоят бо қомат афрохтани иншооту биноҳои муосир куллан тағйир ёфтааст ва қудуми файзбори Пешвои миллат муҳтарам Эмомалӣ Раҳмон ба вусъати корҳои ободонӣ заминаи бештар мегузорад. Мардум ташрифи охирини Сарвари давлатро беҳад интизорӣ мекашиданд. Ҳама ба пешвози Роҳбари кишвар баромаданд. Сониян, бо ташрифи навбатӣ дар тамоми шаҳру ноҳияҳои вилоят корхонаҳои нави саноатӣ, муассисаҳои таҳсилоти миёнаи умумӣ, кӯдакистонҳо, майдончаҳои варзишӣ ва дигар инфрасохтори ҳаётан муҳим мавриди баҳрабардорӣ қарор гирифтанд.

Бо мавриди истифода қарор додани корхонаҳои нави саноатӣ дар вилоят аз як тараф маҳсулоти дохилии аз ҷиҳати экологӣ тоза коркард карда шуда, мардум аз он пурра истифода мебаранд. Аз тарафи дигар ҷойҳои нави корӣ муҳайё гардида, сокинон бо ҷойи кор таъмин гардиданд.

Ҳамзамон, барои рушди соҳаи маориф, ки калиди пешрафти ҷомеа дониста мешавад, дар вилоят муассисаҳои мактабии бо тарҳи муосир ва ба талаботи замони муосир ҷавобгӯ мавриди истифода қарор гирифт, ки барои рушди соҳаи маориф аҳамияти муҳими маърифатӣ доранд.

Воқеан, бо ташрифи Ҷаноби Олӣ вилоят рушд ёфта, маркази маъмурии он - шаҳри Хоруғ ба як шаҳри афсонавӣ мубаддал гаштааст.


Ҷовид Хушқадамов, мудири шуъбаи рушди иҷтимоӣ ва робита бо ҷомеаи дастгоҳи раиси ноҳияи Роштқалъа:

- Ҳар як ташрифи Пешвои миллат муҳтарам Эмомалӣ Раҳмон ба ВМКБ баҳри ободиву созандагӣ ва шукуфоии ҳар як гӯшаву канори вилоят, аз ҷумла ноҳияи Роштқалъа имкониятҳои зиёди нави рушду нумуъро фароҳам меорад. Ташрифе, ки имсол Пешвои миллат ба ин диёри бофарҳангу шоирхез оварданд, дар саҳифаи таърих бо хати зарҳалин сабт гардид. Зеро аз ҷониби Роҳбари давлат нахуст бинои Ҷамоати деҳоти Роштқалъа, бинои муассисаи таҳсилоти миёнаи умумии №26 иборат аз чор ошёна ва бинои Кумитаи иҷроияи Ҳизби Халқии Демократии Тоҷикистон мавриди баҳрабардорӣ қарор дода шуда, ҳамзамон аз дигар норасоиҳо дар ноҳия ҳарф заданд.

Сарвари давлат зимни мулоқот бо сокинони ноҳия таъкид намуданд, ки дар тарбияи фарзанд ва соҳибмаърифат кардани онҳо ҳамеша кӯшиш бояд намуд. Ва иброз доштанд: “Ҳоло дар муассисаҳои таҳсилоти олии касбӣ тибқи Квотаи президентӣ аз ноҳия 173 нафар таҳсил карда истодаанд ва соли ҷорӣ боз 15 нафар хатмкардагон тибқи квота ба ин муассисаҳо дохил шудаанд. Имрӯзҳо танҳо дар муассисаҳои таҳсилоти олии тиббии кишвар 45 нафар фарзандони боистеъдоди ноҳияи Роштқалъа таҳсил карда истодаанд, ки 44 нафари онҳо бо Квотаи президентӣ қабул гардидаанд”.

Таҳияи Наҷиба МУРОДБЕКОВА, “ҶТ”