Дар Донишгоҳи технологии Тоҷикистон конфронси ҷумҳуриявӣ дар мавзӯи “Ҳадаф, моҳият ва вазифаҳои марказҳои рушди касбият (карйера) дар муассисаҳои таҳсилоти олии касбии Ҷумҳурии Тоҷикистон” доир гардид.

Дар ифтитоҳ ректори донишгоҳи номбурда Шоҳиён Нуралӣ маърӯза намуда, иброз дошт, ки “Маркази рушди касбият дар муассисаҳои таҳсилоти олии касбӣ фаъолияти худро дар доираи амалигардонии лоиҳаи UNIWORK-и Иттиҳоди Аврупо ва бо ҳамдастии шарикони ватании лоиҳа - Вазорати маориф ва илм, Палатаи савдо ва саноат ва Донишкадаи политехникии Донишгоҳи техникии Тоҷикистон ба номи академик М. Осимӣ дар шаҳри Хуҷанд ба роҳ мондааст. Ташкили чунин марказҳо падидаи навест дар самти фаъолияти инноватсионии муассисаҳои таълимӣ ва мутобиқгардонии онҳо ба фазои ягонаи таълимоти ҷаҳонӣ, ҳамзамон пайдо намудани роҳҳои баланд бардоштани сатҳи рақобатпазирии донишҷӯён ва хатмкунандагон, бо кор таъмин намудани онҳо ва нуфузи донишгоҳ”.

Аҳрор Ҷаъфаров, сардори Маркази технологияҳои компютерӣ ва таълимӣ, дар мавзӯи “Ташкили курсҳои таълимӣ - омили баланд бардоштани рақобатпазирии касбии донишҷӯён дар бозори меҳнат” маърӯза карда, зикр намуд, таълимоти иловагии касбӣ  яке аз элементҳои асосии ташаккули касбияти мутахассис ва ё донишҷӯ буда, ҳамчун раванди бевоситаи аз худ  намудани дониш ва малакаҳои нави касбӣ ба ҳисоб меравад. Раванди мунтазами ба мақсад нигаронидашудаи тағйири донишҳо, малакаҳо, муносибат ва тафаккури кормандон ҷиҳати баланд бардоштани самаранокии истеҳсолот ва хизматрасониҳо мебошад.

- Мақсад ва моҳияти ташкили курсҳои кутоҳмуддати таълимӣ-сертификатсионӣ дар Донишгоҳи технологии Тоҷикистон баланд бардоштани мақоми илм, таълимот ва касбу ҳунар ҳамчун миссияи таърихии муссисаи таълимӣ барои тараққиёти минбаъдаи кишвар, сафарбар намудани донишҷӯён барои самаранок истифода намудани вақт тариқи ҷалби онҳо ба ин курсҳо, баланд бардоштани тафаккури донишҷуён тариқи васеъ намудани донишҳои иловагии ғайритахассусии онҳо ва  тақвият бахшидан ба тавонмандии эҷодии донишҷуён мебошад, - афзуд А. Ҷаъфаров.

Сипас, Сафарбой Самадов, намояндаи Вазорати маориф ва илм, дар мавзӯи “Аҳамияти татбиқ ва тақвияти марказҳои рушди касбият ва МТОК”, Манзура Рустамова, муовини раиси Палатаи савдо ва саноат дар мавзӯи “Нақши Палатаи савдо ва саноати Ҷумҳурии Тоҷикистон дар ҳамгироии МТОК бо бизнес ва сохторҳо”, Сангин Бобоев, сардори шуъбаи равобити хориҷӣ, ҳамонҳангсози лоиҳаи “UNIWORK” дар мавзӯи “Таҷрибаи ҷаҳонии нақши Марказҳои рушди касбият дар баланд бардоштани нуфуз ва эътибори МТОК”, Музаффар Холиқов, сардори Маркази рушди касбият ва мониторинги рақобатпазирӣ дар бозори меҳнат дар мавзӯи “Таҷрибаи Донишгоҳи технологии Тоҷикистон дар самти ташкили маркази рушди касбият” ва дигарон маърӯза карданд.

Зимни конфронс ду китоби номзади илмҳои техникӣ, доктори илмҳои педагогӣ, профессор Шоҳиён Нуралӣ бо номи “Рақобатшиносӣ ва худташаккулёбии касбӣ” ва “Конкурентология и саморазвитие личности” муаррифӣ гардид. Китобҳои таълифгардида дар соҳаи педагогикаи касбӣ аввалин дастурҳои таълимӣ барои муассисаҳои таҳсилоти олии касбӣ ба шумор мераванд, ки ба ҷанбаҳои муосири баланд бардоштани сатҳи касбияти донишҷӯён дар шароити рақобати бозори меҳнат ва воридшавӣ ба фазои таълимоти ҷаҳонӣ бахшида шудаанд.