Имрӯз зимни нишасти хабарӣ Бобоҷон Сатторзода, ректори Донишгоҳи давлатии молия ва иқтисоди Тоҷикистон, аз тавсеаи ҳамкориҳои байналмилалии Донишгоҳ дар нимсолаи якуми соли 2026 иттилоъ дод.

Ба гуфтаи ӯ, дар доираи ҳамкорӣ бо як қатор ташкилотҳои байналмилалӣ 12 нафар омӯзгори Донишгоҳ дар форуму, семинарҳо ва курсҳои такмили ихтисос дар хориҷи кишвар иштирок намуданд.

Ҳамчунин, дар доираи Барномаи мубодилаи донишҷӯён 6 нафар донишҷӯ барои идомаи таҳсил ба донишгоҳҳои Федератсияи Россия сафарбар гардиданд.

Зикр шуд, ки дар шаш моҳи аввали соли ҷорӣ 31 нафар намояндаи муассисаҳои таҳсилоти олии касбӣ ва ташкилотҳои хориҷӣ аз Донишгоҳ боздид намуда, аз ҷумла 10 нафари онҳо дар доираи барномаи "Профессори даъватӣ" барои донишҷӯён, магистрантон ва омӯзгорон дарс ва машғулиятҳои табодули таҷриба баргузор карданд.

Ректор ҳамчунин гуфт, ки дар доираи ҳамкориҳои байналмилалӣ дар Донишгоҳ курси омӯзиши забони чинӣ ба роҳ монда шуда, 90 нафар донишҷӯ дар ду баст ба омӯзиши ин забон фаро гирифта шудаанд.

Айни замон дар Донишгоҳи давлатии молия ва иқтисоди Тоҷикистон 140 нафар донишҷӯи хориҷӣ аз Ӯзбекистон, Қазоқистон, Олмон, Ҷумҳурии Мардумии Чин ва Федератсияи Россия дар зинаҳои гуногуни таҳсилот ба омӯзиш фаро гирифта шудаанд.

Гулафшон КАРИМОВА, “ҶТ”