Аз 1-уми март то 15-уми апрели соли ҷорӣ давраи бақайдгирии довталабон тариқи Маркази миллии тестии назди Президенти ҷумҳурӣ муқаррар гардид буд. Вале бо дарназардошти муроҷиати зиёди довталабон аз ҷониби масъулини Маркази миллии тестӣ давраи бақайдгирии асосӣ то 30-юми апрел тамдид карда шуд.

Айни ҳол дар марказҳои чанде аз муассисаҳои таҳсилоти умумии пойтахт нуқтаҳои бақайдгирии довталабон ба муассисаҳои олии касбии кишвар тариқи Маркази миллии тестӣ фаъолият менамоянд, ки бо мақсади хизматрасонӣ барои хонандагони муассисаҳои таҳсилоти умумии шаҳри Душанбе пешбинӣ шудаанд. Дар давраи аз нав бақайдгирӣ, яъне аз 16 то 30 апрел, довталабоне, ки дар давраи бақайдгирии асосӣ иштирок кардаанд, метавонанд дубора иштирок намуда, тағйиру иловаҳоро роҷеъ ба иваз намудани ҳуҷҷатҳои худ ба Маркази миллии тестӣ супоранд ва барои ин ба довталабон варақаи шахсие, ки дар давраи бақайдгирии асосӣ супорида шудааст, инчунин расид аз бонки давлатии амонатгузории Тоҷикистон “Амонатбонк” бо супоридани маблағи муайян лозим аст.

Пас аз супоридани ҳуҷҷатҳо ба довталабон кабинети инфиродӣ кушода мешавад, ки довталаб бо истифода аз он метавонад раванди супоридани имтиҳонҳои марказонидаи дохилшавии 2016-и Маркази миллии тестиро назорат намуда, ҳамчунин аз гирифтани холҳои худ дар имтиҳонҳо огоҳӣ ёбанд.

Тавре масъулини Маркази миллии тестӣ иброз медоранд, аз ҷониби довталабон талабот ба равияҳои тиббӣ, педагогӣ, санъат ва варзиш нисбатан зиёд аст.

Яке аз талаботҳои асосӣ аз довталабон ин аст, ки онҳо бояд аз техникаи компютерӣ ба пуррагӣ огаҳ буда, сайтҳо ва шабакаҳои интернетиро васеъ истифода карда тавонанд.