Дар даври ҷумҳуриявии олимпиадаҳои соли таҳсили 2025 - 2026 6 ҳазору 904 нафар хонанда иштирок намуда, аз ин шумора 3 ҳазору 526 нафар сазовори ҷойҳои ифтихорӣ гардидаанд.

Дар ин бора 10 июл Саидзода Раҳим Ҳамро, вазири маориф ва илми Ҷумҳурии Тоҷикистон зимни нишасти матбуотӣ иттилоъ дод.

Вазир дар шарҳи олимпиадаҳои ҷумҳуриявӣ илова намуд, ки ғолибони он соҳиби 243 медали тилло, 618 медали нуқра ва 2 665 медали биринҷӣ шуданд. Ин нишондиҳанда нисбат ба соли 2025, 601 ҷойи ифтихорӣ бештар мебошад.

Ҳамчунин, зикр гардид, ки дар самти иштироки хонандагон дар олимпиадаҳои байналмилалӣ ҳамкорӣ бо 16 кумитаи тадорукоти озмуну олимпиадаҳои байналмилалӣ ба роҳ монда шудааст. Дар даври ниҳоии олимпиадаҳои байналмилалӣ 166 нафар хонандаи тоҷик иштирок намуда, соҳиби 102 ҷойи ифтихорӣ гардидаанд, ки ин нишондиҳанда нисбат ба соли 2025, 3 ҷойи ифтихорӣ зиёд мебошад.

Вобаста ба масъалаи муассисаҳои томактабӣ иттилоъ дода шуд, ки теъдоди муассисаҳои томактабӣ ба 831 адад расида, шумораи кӯдакони фарогирифташуда 134 263 нафарро ташкил медиҳад. Ин нишондиҳанда нисбат ба ҳамин давраи соли 2025, 74 муассиса ва 15 871 кӯдак зиёд мебошад.

Ҳамчунин таъкид гардид, ки дар маҷмӯъ, бо дарназардошти марказҳои инкишофи барвақтии кӯдакон, шумораи умумии кӯдакони фарогирифташуда ба таҳсилоти томактабӣ ба 317 ҳазору 973 нафар расида, 30,8 фоизи кӯдакони синни дахлдорро ташкил медиҳад. Ин нишондиҳанда нисбат ба ҳамин давраи соли гузашта 66 ҳазору 220 кӯдак зиёд аст.

М. МУҚАДДАМОВА, “ҶТ”