Имрӯз, 22 октябр, Намоишгоҳи 12-уми байналмилалии “Китоби Душанбе” дар Осорхонаи миллии Тоҷикистон оғоз шуд. Дар намоишгоҳи мазкур 5 ҳазор китоби тозанашри зиёда аз 40 ноширро пешниҳод намуданд. Намоиш то 24 октябр идома меёбад.

Намояндагони корхонаҳои табъу нашри давлатҳои Иттиҳоди Давлатҳои Мустақил, инчунин Туркия, Эрон ва Чин, Ҳиндустон, Россия, Туркманистон ва ноширони Тоҷикистон дар ин намоишгоҳ иштирок доранд.

Мақсад аз баргузор намудани чунин як намоишгоҳ ин муаррифии китобҳо ва таҳкиму густариши робитаҳои фарҳангии кишварҳо миёни ҳамдигар ва ташвиқи китобхонӣ дар ҷомеа мебошад.

Маврид ба зикр аст, ки баргузории Намоишгоҳи байналмилалии “Китоби Душанбе”, барои пайдо кардани шарикони боваринок дар самти таҳия ва нашр намудани китобҳо иқдоми хуб ба ҳисоб меравад.

Ёдовар мешавем, ки тибқи Қарори Ҳукумати Ҷумҳурии Тоҷикистон аз соли 2010 инҷониб ҳамасола дар пойтахт Намоишгоҳи байналмилалии “Китоби Душанбе” доир мешавад.

Шаҳодат ХОЛОВА, "ҶТ"