Дар шаш моҳи соли равон дар Тоҷикистон 2 819 ҳолати ҳуқуқвайронкунии гумрукӣ ба қайд гирифта шудааст, ки нисбати ҳамин давраи соли гузашта 876 ҳолат зиёд аст.

Дар ин бора Каримазода Хуршед, раиси Хадамоти гумруки назди Ҳукумати Ҷумҳурии Тоҷикистон 7 - уми август зимни нишасти матбуотии ниҳоди зери идорааш иттилоъ дод.

Номбурда афзуд, ки аз шумораи умумии ин ҳуқуқвайронкуниҳо 33 ҳолат ба ошкор ва таҳқиқи ҷиноятҳо рост меояд, дар ҳоле ки соли гузашта танҳо 31 ҳолат сабт шуда буд.

Ба иттилои Х. Каримзода 20 парвандаи ҷиноятӣ бо моддаи 289 (қочоқ), 6 ҳолат бо моддаи 340 (сохтакорӣ) ва дигар ҳолатҳо бо моддаҳои марбут ба гардиши ғайриқонунии маводи нашъаовар ва психотропӣ сабт гардидаанд.

Ҳамзамон, дар ҳамин давра 2 786 парвандаи ҳуқуқвайронкунии маъмурӣ ба қайд гирифта шудааст, ки аз он 2 682 парванда дар марҳилаи баррасӣ қарор доранд. Аз шумораи умумӣ 271 парванда ба мақомоти судӣ ирсол гардидаанд. Дар маҷмуъ, 2 791 шахси воқеӣ ва ҳуқуқӣ ба ҷавобгарии маъмурӣ ҷалб шудаанд.

- Дар натиҷаи баррасии парвандаҳо ба маблағи 4,7 миллион сомонӣ ҷарима таъин шудааст, ки нисбат ба ҳамин давраи соли гузашта 950 ҳазор сомонӣ зиёд мебошад. Илова бар ин, дар 183 ҳолат ба маблағи 3,6 миллион сомонӣ молҳо мусодира гардиданд, - илова кард номбурда.

Фарзонаи УМАРАЛӢ, “ҶТ”