Абдулло Қурбонзода муовини директори ҶСК “Барқи Тоҷик” имрӯз дар нишасти матбуотӣ ба намояндагони ВАО иттилоъ дод, ки дар шашмоҳаи аввали соли равон дар неругоҳҳои барқи обӣ ва марказҳои барқу гармдиҳии ҶСК “Барқи Тоҷик” ҳаҷми истеҳсоли неруи барқ дар маҷмуъ 8 млрд. 893,4 миллион кВт соатро ташкил дод, ки ин нисбат ба ҳамин давраи соли 2024 дар ҳаҷми 944,6 млн кВт соат зиёд мебошад.

Аз ҷумла истеҳсоли неруи барқ дар неругоҳҳои барқи обӣ дар ҳаҷми 8 млрд 34,5 млн кВт соат ва дар марказҳои барқу гармдиҳӣ дар ҳаҷми 858.9 млн кВт соат таъмин карда шудааст, - гуфт номбурда.

Ҳамзамон, гуфта шуд, ки дар давраи ҳисоботӣ талафоти неруи барқ дар неругоҳҳои барқи обӣ ва марказҳои барқу гармдиҳии ҶСК “Барқи Тоҷик” дар маҷмуъ 34,3 млн кВт соат, ё ин ки 0,39%- и барқи истеҳсолшударо ташкил дода, ин нишондод ба ҳамин давраи соли гузашта дар ҳаҷми 1,0 млн кВт соат, ба андозаи 0,05% коҳиш ёфтааст.

Дар охир зикр гардид, ки ҳаҷми истеҳсоли неруи гармӣ дар давраи ҳисоботӣ ба 812,6 ҳазор Гкал баробар шуда, нисбат ба ҳамин давраи соли 2024 дар ҳаҷми 29,7 ҳазор Гкал зиёд гардидааст, - афзуд муовини директори ҶСК.

М. МУҚАДАМОВА, “ҶТ”