Соли 2025 дар шаҳри Душанбе 63 адад корхонаю коргоҳҳои истеҳсолӣ бо таъсиси беш аз 8 ҳазор адад ҷойҳои нави корӣ ба фаъолият оғоз намудаанд. Дар ин хусус Бахтиёр Шарифӣ, муовини якуми раиси шаҳри Душанбе имрӯз - 5 феврал зимни нишасти матбуотӣ иттилоъ дод.

Номбурда, ҳамзамон, қайд намуд, ки давоми соли сипаригардида бо иштироки Роҳбари давлат ва раиси шаҳри Душанбе 7 корхонаи нави истеҳсолӣ дар самтҳои истеҳсоли сару либос, истеҳсоли заргарӣ, сафолакҳо, хишти сабук, оҳак, обҳои ташнагишикан ва истеҳсоли гӯшт бо ворид намудани таҷҳизоту технологияхои нав ва аз ҷиҳати экологӣ тоза бо таъсиси 1400 ҷойи нави корӣ мавриди истифода қарор дода шудааст.

Инчунин, гуфта шуд, ки дар пойтахти кишварамон - шаҳри Душанбе айни замон сохтмони муассисаҳои таҳсилоти миёнаи умумӣ ва томактабӣ, меҳмонхонаҳо, иншооти иҷтимоию фарҳангӣ, варзишӣ, сайёҳӣ, марказҳои бузурги савдову хизматрасонӣ, корхонаҳои нави истеҳсолӣ ва роҳҳои автомобилгарди ду-сеқабата (эстакада) ба роҳ монда шудааст. Дар маҷмуъ дар ин давра беш аз 713 ҳазор метри мураббаъ иншооти маъмурӣ, хонаҳои истиқоматӣ ва марказҳои савдову хизматрасонӣ ба истифода дода шудааст, ки нисбат ба соли пешин бамаротиб зиёд мебошад.

Аз рӯйдодҳои муҳими ин давра эълон гардидани шаҳри Душанбе ҳамчун "Пойтахти фарҳангии Осиё дар соли 2026" арзёбӣ гардид, ки аз ҷониби Шурои иҷроияи фарҳангии Осиё 28 ноябри соли 2025 тасдиқ гардидааст.

Пойтахти Ҷумҳурии Тоҷикистон - шаҳри Душанбе айни ҳол бо 23 шаҳрҳои қитъаҳои Осиё, Аврупо, Амрико ва Африқо муносибатҳои бародаршаҳрӣ дошта, бо 5 шаҳр, аз ҷумла Москва, Тошканд, Пекин, Ченду ва Ханджоу дар асоси Созишномаи байнидавлатӣ муносибатҳои ҳамкориро дар соҳаҳои тиҷоратӣ - иқтисодӣ, илмӣ - техникӣ ва фарҳангӣ ба роҳ мондааст.

Шаҳло ЭШОНОВА, “ҶТ”