Вазорати меҳнат, муҳоҷират ва шуғли аҳолии Ҷумҳурии Тоҷикистон ҷиҳати таъмини ҳимояи ҳуқуқу манфиатҳои муҳоҷирони меҳнатӣ Протокол оид ба ворид намудани тағйиру иловаҳо ба Созишномаи байни Ҳукумати Ҷумҳурии Тоҷикистон ва Ҳукумати Федератсияи Русия дар бораи мақоми намояндагиҳои мақомоти салоҳиятдор оид ба масъалаҳои корҳои дохилӣ ва муҳоҷират ба имзо расонид.

Ин нукта дар нишасти матбуотии ин ниҳод имрӯз - 3 феврал иброз гардид.

Тавре Солеҳа Холмаҳмадзода, вазири меҳнат, муҳоҷират ва шуғли аҳолии кишвар ба хабарнигорон иттилоъ дод, ин иқдом бо мақсади муташаккилона ба роҳ мондани муҳоҷирати меҳнатӣ, омода намудани кадрҳои баландихтисос бо мақсади қонеъ гардонидани талаботи бозори меҳнати Федератсияи Русия бо қувваи корӣ ва таъмини муҳоҷирони меҳнатӣ - шаҳрвандони Ҷумҳурии Тоҷикистон бо ҷойҳои кори қонунӣ ва бехатар дар Федератсияи Русия роҳандозӣ гардида, имкон фароҳам меорад, то минбаъд раванди ҳуҷҷатгузорӣ, аз ҷумла гирифтани маълумотнома оид ба гузаштан аз муоинаи тиббӣ, супоридани изи ангушт, гирифтани сертификат оид ба донистани забони русӣ, таърих ва қонунгузории Федератсияи Русия дар дохили ҷумҳурӣ пеш аз сафар анҷом дода шуда, шаҳрванд дар ҳудуди Федератсияи Русия танҳо патент гирифта, ба фаъолияти меҳнатӣ шуруъ намоянд.

Ҳамзамон, қайд гардид, ки дар соли 2025 аз ҷониби 30 субъекти хоҷагидори дорои иҷозатнома барои интиқоли қувваи корӣ ба хориҷи кишвар 35 ҳазору 747 нафар ба хориҷи кишвар бо кор таъмин гардиданд, ки нисбат ба соли пешин 18805 нафар зиёд мебошад. Аз ҷумла, тавассути сохторҳои дахлдори вазорат 21669 нафар дар кишварҳои хориҷа бо кор таъмин карда шудаанд.

Инчунин, масъалаи бо ҷойи кор таъмин намудани шаҳрвандони Ҷумҳурии Тоҷикистон, бахусус муҳоҷирони баргашта дар корхонаву ташкилотҳое, ки ба ҷалби қувваи корӣ дар Ҷумҳурии Тоҷикистон машғуланд, муҳим арзёбӣ гардида, таъкид карда шуд, ки дар соли сипаригардида 55 ҳазору 88 нафар дар ширкатҳое, ки ба ҷалби қувваи корӣ машғуланд, бо кор таъмин гардиданд. Теъдоди кормандони хориҷӣ 5433 нафар ва шумораи кормандони маҳаллӣ 49 ҳазору 655 нафарро ташкил дода, таносуб ба ҳисоби миёна 90,1 фоиз ба 9,9 фоиз баробар аст. Аз ҷумла, 16 ҳазору 200 нафар муҳоҷири ихроҷ ва бозпасгардондашуда буда, аз ин 2565 нафар дар ширкатҳои ҶСК "НБО Роғун" бо кор таъмин шудаанд.

Шаҳло ЭШОНОВА, “ҶТ”