Оймуҳаммадзода Султон, сардори Саридораи геологияи назди Ҳукумати Ҷумҳурии Тоҷикистон дар нишасти матбуотии ниҳоди зери идорааш иттилоъ дод, ки дар доираи татбиқи лоиҳаҳои давлатӣ дар самти гидрогеология ва муҳандисӣ-геология як қатор корҳои тадқиқотӣ ва мушоҳидавӣ анҷом дода шудаанд.

Зикр гардид, ки мутобиқ ба лоиҳаи “Умури давлатии мушоҳидаи равандҳои экзогени геологӣ барои солҳои 2020–2025” дар 824 деҳаи ҳудуди шаҳру ноҳияҳои тобеи ҷумҳурӣ, Вилояти Мухтори Кӯҳистони Бадахшон, вилоятҳои Суғд ва Хатлон тадқиқоти муҳандисӣ-геологӣ гузаронида шуд. Дар натиҷаи ин тадқиқот ба 127 хоҷагӣ ва 1 муассисаи таҳсилоти миёнаи умумӣ барои аз минтақаҳои хавфнок ба ҷойҳои бехавф кӯчонидан пешниҳод манзур гардид.

Ҳамчунин, Оймуҳаммадзода иттилоъ дода, ки тибқи лоиҳаи “Кадастри давлатии об” мушоҳидаҳои реҷавӣ дар 150 ва мушоҳидаҳои такрорӣ дар 206 обанбор дар шаҳрҳои Душанбе, Турсунзода, Ҳисор, Ваҳдат, Роғун, Бохтар, Левакант, инчунин, дар ноҳияҳои Кӯшониён, Шаҳритус, Қубодиён, Мир Сайид Алии Ҳамадонӣ, Носири Хусрав, Фархор, Панҷ, Ҷалолиддини Балхӣ, Вахш, Ёвон, Файзобод, Нуробод, Шаҳринав, Дӯстӣ, Рашт ва Рӯдакӣ анҷом дода шуданд.

Дар ҷараёни корҳои мазкур 64 адад маҳак барои гузаронидани ташхиси кимиёвӣ гирифта шуд. Илова бар ин, дар ҳавзаҳои дарёҳои Сир ва Зарафшон мушоҳидаҳои аввала дар 30 пармачоҳ, мушоҳидаҳои такрорӣ дар 65 пармачоҳ ва 336 ченкунии реҷавии пармачоҳҳо анҷом ёфта, 207 адад маҳакҳои об барои ташхиси кимиёвӣ супорида шуданд.

Гуфта шуд, ки тибқи лоиҳаи “Ҷустуҷӯи обҳои зеризаминӣ барои бо об таъмин намудани объектҳои тандурустӣ, маориф ва таъминоти иҷтимоии ҷумҳурӣ” дар ҳудуди ҷумҳурӣ 9 пармачоҳ бо зарфи умумии 760 метр парма карда шудаанд.

Таъкид гардид, ки анҷом додани корҳои гидрогеологӣ ва муҳандисӣ-геологӣ ба коҳиш додани хатари офатҳои табиӣ, таъмини амнияти аҳолӣ, инчунин, беҳтар намудани дастрасӣ ба оби нӯшокӣ ва рушди инфрасохтори иҷтимоӣ мусоидат менамояд.

Яҳё МАҲМАДНАБИЕВ, “ҶТ”