Дар соли 2025 дар қаламрави Ҷумҳурии Тоҷикистон ҳамагӣ 287 ҳодисаи фавқулодаи дорои хусусияти табиӣ ба қайд гирифта шудааст, ки нисбат ба соли 2024 коҳиши назаррасро нишон медиҳад.

Дар ин бора зимни нишасти матбуотӣ Раҷалӣ Раҳмоналӣ, раиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон иттилоъ дод.

Тибқи маълумоти пешниҳодгардида, дар давраи ҳисоботӣ бештар ҳолатҳои сел ва тармафароӣ ба қайд гирифта шуда, аз ҷумла 83 маротиба ҳодисаи сел омадан, 79 маротиба тармафароӣ, 35 маротиба заминларза, 24 маротиба сангрез, 18 маротиба боришоти шадиди борон, 18 маротиба шамоли сахт, 14 маротиба баландшавии сатҳи об, 9 маротиба фаромадани ярч, 4 ҳолати раъду барқ, 2 ҳолати боришоти зиёди барф ва 1 ҳолати хунукии шадид сабт гардидааст. Аз шумораи умумии ҳолатҳои ба қайд гирифташуда, дар 12 ҳолат офатҳои табиӣ ба иқтисодиёти шаҳру ноҳияҳои кишвар зарар расонида, ҳаҷми умумии зарари молиявӣ 20 миллиону 758 ҳазору 700 сомониро ташкил додааст.

Мувофиқи арзёбиҳои таҳлилӣ, бештари зарар аз ҳисоби боришоти шадиди борон ва омадани сел ба қайд гирифта шуда, 4 ҳолат ё 33,3 фоизро ташкил медиҳад, ҳолатҳои фаромадани тарма 3 ҳолат ё 25 фоиз, раъду барқ 2 ҳолат ё 16,7 фоиз, фуруравии замин ва ярч 2 ҳолат ё 16,7 фоиз ва заминларза 1 ҳолат ё 8,3 фоизро дар бар мегирад. Ин ҳодисаҳо дар шаҳрҳо ва ноҳияҳои Панҷакент, Айнӣ, Варзоб, Рушон, Лахш, Рашт, Тоҷикобод, Деваштич ва шаҳри Роғун ба қайд гирифта шудаанд. Мутаассифона, дар натиҷаи ҳолатҳои фавқулодаи табиӣ дар соли 2025 шаш нафар шаҳрвандони ҷумҳурӣ ба ҳалокат расидаанд, ки аз онҳо се нафар бар асари фаромадани тарма, ду нафар дар натиҷаи раъду барқ ва як нафар дар пайи заминларза ҷони худро аз даст додаанд.

Барои муқоиса зикр гардид, ки дар соли 2024 дар қаламрави ҷумҳурӣ 639 ҳолати фавқулодаи дорои хусусияти табиӣ ба қайд гирифта шуда, дар 50 ҳолат ба иқтисодиёти кишвар зарар расонида, ҳаҷми умумии зарар 161 миллиону 50 ҳазору 100 сомониро ташкил дода, дар натиҷаи ин офатҳо 17 нафар шаҳрвандон ба ҳалокат расида буданд.

Мақомоти масъул таъкид намуданд, ки гарчанде шумораи офатҳои табиӣ дар соли 2025 коҳиш ёфтааст, масъалаи пешгирӣ ва омодагии аҳолӣ ба чунин хатарҳо ҳамоно муҳим боқӣ монда, тадбирҳои зарурӣ ҷиҳати коҳиши талафоти ҷонӣ ва иқтисодӣ идома дода мешаванд.

Яҳё МАҲМАДНАБИЕВ, “ҶТ”