Давоми соли 2025 ҳаҷми маҷмуи маҳсулоти дохилӣ ба 176,9 млрд сомонӣ ва суръати афзоиши он ба 8,4 фоиз баробар гардидааст.

Ин нуктаро Файзиддин Қаҳҳорзода, вазири молияи Ҷумҳурии Тоҷикистон имрӯз - 13 феврал баён намуда, аз ҷумла қайд намуд, ки дар ин давра иҷрои нақшаи қисми даромади буҷети давлатӣ дар сатҳи 113,2 фоиз таъмин карда шуда, ба буҷети мазкур зиёда аз 60,3 млрд сомонӣ ворид гардидааст.

Инчунин, зикр гардид, ки иҷрои нақшаи даромади ҷории буҷети давлатӣ ба дарназардошти грантҳо барои дастгирии буҷет дар сатҳи 119,2 фоиз таъмин гардида, воридоти маблағҳо 44,9 млрд сомониро ташкил дод.

Дар доираи лоиҳаҳои сармоягузории давлатӣ 8,2 млрд сомонӣ аз худ карда шудааст, ки аз ин маблағ 6 млрд сомонӣ ё 73,2 фоиз маблағҳои грантӣ ва 2,2 млрд сомонӣ ё 26,8 фоиз маблағҳои қарзӣ мебошанд.

Нақшаи қисми даромади буҷети давлатӣ бошад, дар ин давра дар сатҳи 120,4 фоиз таъмин шуда, ба буҷети мазкур 31,5 млрд сомонӣ ворид гардидааст.

- Ҳамзамон, иҷрои нақшаи қисми даромади буҷетҳои маҳаллӣ дар сатҳи 112,9 фоиз таъмин гардида, ҳаҷми умумии воридоти маблағҳо 13,6 млрд сомониро ташкил дод. Хароҷоти буҷети давлатӣ дар соли 2025 дар доираи нақшаи пешбинигардида ва даромадҳои воқеии буҷет амалӣ карда шуда, ба соҳаҳои иқтисодию иҷтимоии кишвар 57,1 млрд сомонӣ равона гардидааст, ки 11,3 млрд сомонӣ ба соҳаи маориф рост меояд- гуфт Ф. Қаҳҳорзода.

Шаҳло ЭШОНОВА, “ҶТ”