Агентии рейтингии S&P Global Ratings радабандии дарозмуддати соҳибихтиёрии қарзии Ҷумҳурии Тоҷикистонро аз дараҷаи “B-” то “B” бо дурнамои “устувор” бинобар беҳтар шудани нишондиҳандаҳои иқтисодӣ баланд бардошт.

Бино ба иттилои Бонки миллии Тоҷикистон, ба болоравии рейтинг омилҳои зерин, аз қабили рушди устувори иқтисодӣ ва афзоиши захираҳои байналмилалӣ, мусоидат намуда, имкон медиҳанд кишвари мо уҳдадориҳояшро дар самти хизматрасонии қарзи беруна ва коҳиш додани фишори эҳтимолӣ ба тавозуни пардохт сари вақт иҷро намояд.

Инчунин таҳкими нишондиҳандаҳои иқтисоди берунӣ тайи солҳои охир, интизории боқӣ мондани ҳиссаи назарраси қарзҳои имтиёзнок дар таркиби қарзи давлатӣ мусоидат намуданд.

Радабандии дарозмуҳлати қарзии S&P “В” маънои онро дорад, ки эмитент (қарзгиранда) пардохтпазир аст, аммо шароити ноустувори иқтисодӣ метавонад ба имкониятҳо ва омодагии ӯ барои пардохти қарзҳо таъсир расонад.

Бояд гуфт, ки маълумоти таҳлилии агентӣ ба мақоми додашуда дар радабандӣ барои ҷалби сармоягузориҳои хориҷӣ истифода шуда, дастрасӣ ба бозорҳои молиявии байналмилалиро барои ҷумҳурӣ боз мекунад.

Мавриди зикр аст, ки рейтинг соле як бор дода мешавад. Аз ҷумла, соли 2023 низ Агентии рейтингии S&P Global Ratings ба Ҷумҳурии Тоҷикистон рейтинги “B-/В”-ро бо дурнамои “устувор” сазовор дониста буд.