Дар нимсолаи аввали соли 2026 маҷмуи маҳсулоти минтақавии вилояти Хатлон ба 19,9 миллиард сомонӣ расида, рушди воқеии он 108,1% таъмин гардидааст. Дар ин бора имрӯз - 10 август, Давлаталӣ Саид, раиси вилояти Хатлон зимни нишасти матбуотӣ иттилоъ дод.

Ба иттилои раиси вилоят ин нишондиҳанда нисбат ба ҳамин давраи соли гузашта 2,8 миллиард сомонӣ зиёд буда, ҳиссаи вилояти Хатлон дар ММД-и кишвар дар давраи ҳисоботӣ 24,3 фоизро ташкил додааст.

Ба қавли Давлаталӣ Саид дар нимсолаи аввали соли ҷорӣ нақшаи қисми даромади буҷети вилоят бо дарназардошти андози иҷтимоии ғайрибуҷетӣ 103% иҷро гардида, ба буҷет 1 миллиарду 974,4 миллион сомонӣ ворид шудааст. Ин нишондиҳанда нисбат ба нақша 58,3 миллион сомонӣ зиёд мебошад.

Ҳамчунин зимни нишасти хабарӣ иттилоъ дода шуд, ки гардиши моли дохилӣ дар нимсолаи аввали соли 2026 ба 13,3 миллиард сомонӣ расида, нисбат ба ҳамин давраи соли гузашта 5,2 миллиард сомонӣ ё 59,3 фоиз афзоиш ёфтааст.

Ҳаҷми хизматрасонии пулакӣ ба аҳолӣ 1,6 миллиард сомониро ташкил дода, нисбат ба ҳамин давраи соли 2025-ум 212 миллион сомонӣ ё 11,2 фоиз зиёд шудааст.

Гардиши савдои хориҷии вилоят дар шаш моҳи соли ҷорӣ 232,9 миллион доллари амрикоиро ташкил додааст. Аз ин маблағ 106,1 миллион доллар ба содирот ва 126,8 миллион доллар ба воридоти молу маҳсулот рост меояд.

Шаҳноза АЗИМОВА, “ҶТ”