То 30 июни соли 2026 дар Ҷумҳурии Тоҷикистон дар маҷмӯъ 69 ташкилоти қарзии молиявӣ фаъолият дошта, аз ин шумора 18 бонки анъанавӣ, як бонки исломӣ, 27 ташкилоти амонатии қарзии хурд, ду ташкилоти қарзии хурд ва 21 фонди қарзии хурд мебошанд.

Дар ин бора Фирдавс Толибзода, раиси Бонки миллии Тоҷикистон 20 июл зимни нишасти матбуотӣ иттилоъ дода, дар идома илова намуд, ки теъдоди воҳидҳои сохтории ташкилотҳои қарзии молиявӣ ба ҳолати 30 июни соли ҷорӣ ба 1 ҳазору 971 адад расидааст. Ин нишондиҳанда нисбат ба ҳамин давраи соли гузашта 29 адад зиёд мебошад.

Ҳамчунин, зикр гардид, ки дар нимсолаи якуми соли 2026 қурби расмии доллари ИМА нисбат ба сомонӣ 0,17 фоиз тағйир ёфтааст. Қурби расмии як доллар аз 9,2513 сомонӣ дар 31 декабри соли 2025 ба 9,2674 сомонӣ дар 30 июни соли 2026 расидааст.

Ба гуфтаи раиси Бонки миллии Тоҷикистон бо назардошти вазъи мураккаби иқтисоди ҷаҳонӣ дар ин давра қурби расмии асъори миллии аксари кишварҳои шарики асосии тиҷоратии Тоҷикистон низ тағйир ёфтааст.

Аз ҷумла, дар ин давра қурби тангаи Қазоқистон 3,33 фоиз, юани Чин 3,1 фоиз ва рубли Федератсияи Русия 0,60 фоиз нисбат ба доллари ИМА устувор гардидааст. Ҳамзамон, қурби лираи Туркия 8,62 фоиз, рубли Беларус 0,13 фоиз, сӯми Узбекистон 0,30 фоиз ва соми Қирғизистон 0,04 фоиз нисбат ба доллари ИМА коҳиш ёфтааст.

М. МУҚАДДАМОВА, “ҶТ”