Дар шашмоҳаи аввали соли ҷорӣ, дар Ҷумҳурии Тоҷикистон 251 корхонаи нави саноатӣ таъсис дода шуда, дар ин давра 92 корхона аз фаъолият бозмондаанд.

Дар ин бора имрӯз - 1 август Шералӣ Кабир, вазири саноат ва технологияҳои нави Ҷумҳурии Тоҷикистон зимни нишасти матбуотӣ ба хабарнигорон иттилоъ дод.

Аз ҷумла, гуфта шуд, ки дар ВМКБ 4 корхона, дар вилояти Суғд 23 корхона, дар Хатлон 21, дар шаҳри Душанбе 24 ва дар шаҳру навоҳии тобеи марказ 20 корхона аз фаъолият бозмондаанд.

Сабабҳои асосии аз фаъолият бозмондани корхонаҳоро вазир ба омилҳои гуногун аз ҷумла, мушкилоти молӣ рабт дод.

- Муваққатан фаъолият накардани корхонаҳо ба мушкилоти молӣ дучор гардидани онҳо , аз ҷумла қарздории андозию бонкӣ, иҷоравӣ, аз кишвар рафтани соҳибмулкони корхонаҳо дар давоми паҳншавии бемории сироятии COVID -2019, поёнравии сатҳи рақобатнокии маҳсулоти истеҳсолӣ нисбат ба маҳсулоти воридотӣ, болоравии нархи ашёи хом ва набудани талабот ба фурӯш маҳсулот ба ҳисоб меравад, - баён дошт, вазир.

Бояд зикр кард, ки дар Ҷумҳурии Тоҷикистон ба ҳолати 1 июли соли 2024 3580 корхонаи саноатӣ ба қайд гирифта шудааст.