ИҚТИСОД
Шанбе 22 Июн 2024 10:31
10168
9 апрел Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба шаҳри Бӯстон ташриф оварда, дар коргоҳи истеҳсоли “Ванадий”-и Коргоҳи фаръии “Истеҳсоли гидрометаллургӣ” бо хатти истеҳсолӣ пас аз анҷоми корҳои навсозӣ ва барқарорсозӣ шинос шуданд.

Бояд қайд кард, ки коргоҳи мазкур аз солҳои 80-ум инҷониб бе кор буд ва пас аз танаффуси тулонӣ хатти аввали истеҳсолии коргоҳ дар доираи амалӣ намудани иқдомҳо ҷиҳати рушди соҳаи саноат ва роҳандозии истеҳсоли маҳсулоти ба содирот нигаронидашуда пурра навсозӣ гардида, дар он истеҳсоли “Поливанадати аммоний” ва “Панҷоксидаи ванадий” роҳандозӣ гардидааст.

Коргоҳ иқтидор дорад, ки дар як сол то 200 тонна маҳсулот истеҳсол намуда, ба бозорҳои ҷаҳонӣ пешниҳод намояд. Маҳсулоти истеҳсолшуда таъиноти содиротӣ дошта, ба Федератсияи Русия, кишварҳои Аврупо ва Ҷумҳурии Узбекистон содирот мешавад ва ин таҷрибаи нахустин ба ҳисоб меравад.

Коргоҳ дар асоси ашёи хоми воридотӣ фаъолият намуда, ҳамкорӣ бо корхонаҳои азими Федератсияи Русия ва Ҷумҳурии Узбекистон барои дастрассозии ашёи хом ба роҳ монда шудааст.

Зимни боздид иттилоъ дода шуд, ки маҳсулоти ниҳоии коргоҳ серхаридор буда, “Ванадий” барои мустаҳкамсозии таркиби металл, тобовар намудани он ба гармиву сардии аз меъёр зиёд ва дар саноати истеҳсоли рангҳои ороишӣ ба таври васеъ истифода бурда мешавад. Хатти истеҳсолии коргоҳ дар асоси технологияи ватанӣ ва аз Федератсияи Русия бо ҷалби сармояи дохилӣ пурра навсозӣ шуда, сифати баланди маҳсулотро мутобиқи талаботи бозорҳои ҷаҳонӣ таъмин мекунад.

Барои истеҳсоли маҳсулоти баландсифат ашёи хом аз 10 марҳилаи коркард гузашта, сипас дар доираи стандартҳои ҷории байналмилалӣ маҳсулоти ниҳоӣ истеҳсол карда мешавад ва назорати сифати он низ бо ҷалби мутахассисони баландтаҷриба роҳандозӣ гардидааст.

Дар маҷмуъ, дар коргоҳи истеҳсолӣ 60 нафар сокини маҳаллӣ соҳиби кор гардида, бо маоши хуб таъмин шудаанд.

Тавре иттилоъ дода шуд, дар марҳилаҳои баъдии барқарорсозӣ шумораи кормандон ба 150 нафар расонида мешавад. Ҳамчунин иқтидори истеҳсолии коргоҳ низ бо таҷдид гардидани дигар хаттҳои истеҳсолӣ дар солҳои оянда боз ҳам баландтар хоҳад гашт.

Ба кор шуруъ кардани хати истеҳсолӣ идомаи тадбирҳо дар роҳи рушди истеҳсолоти ватанӣ, афзоиш додани номгӯи маҳсулоти саноатии дар дохили кишвар истеҳсолшаванда ва зиёд намудани ҳаҷми истеҳсоли маҳсулоти таъиноти содиротидошта буда, натиҷаи татбиқи босамари нақшаҳои “Солҳои рушди саноат” маҳсуб меёбад.

Дар ҳамин ҷо ҳамчунин, Президенти Ҷумҳурии Тоҷикистон муҳтарам Эмомалӣ Раҳмон бо дурнамои рушди Корхонаи воҳиди давлатии “Фулузоти нодири Тоҷикистон” ошно гардиданд.

Зимни муаррифӣ иттилоъ дода шуд, ки дар доираи дастуру супоришҳои Пешвои миллат корхона ҳадаф дорад марҳила ба марҳила иқтидори худро барқарор намуда, истеҳсоли маҳсулоти гуногуни саноатиро афзоиш диҳад. Аз ҷумла, дар оянда қисмати дигари коргоҳи истеҳсоли “Ванадий” навсозиву барқарор хоҳад шуд.

Дар ин баробар, “Лоиҳаи корхонаи раванди холисгардонии тилло ва нуқра”, “Лоиҳаи корхонаи безараргардонии замин ва коркарди дубораи партовҳои саноатӣ” ва “Лоиҳаи Маркази муосири логистикӣ” муаррифӣ карда шуд. Гуфта шуд, ки бунёди “Маркази муосири логистикӣ” аллакай оғоз гардида, тибқи нақша, дар дохили он сардхона, анбор, минтақаи гумрукӣ, минтақаи бастабандӣ, ошхона, хобгоҳ ва дигар иншооти зарурӣ бунёд карда мешавад.

Тибқи нақша, “Корхонаи раванди холисгардонии тилло ва нуқра” бошад, дар асоси технология ва методҳои нави холисгардонӣ бунёд ёфта, он ба ҷалб намудани ширкатҳои маҳаллӣ ва ҷаҳонӣ ба хизматрасониҳои холискории худ ва ташкили ҳамкориҳои нав дар соҳаи истеҳсоли металлҳои қимматбаҳо мусоидат менамояд. Ҳамчунин бунёди ин корхона дар оянда мавқеи Тоҷикистонро дар бозори ҷаҳонии металлҳои қиматбаҳо ба таври назаррас таҳким хоҳад бахшид.

Дар тадбири имрӯза ҳамчунин дигар номгӯи маҳсулот, ки дар коргоҳҳои истеҳсолии зертобеи КВД “Фулузоти нодири Тоҷикистон” истеҳсол карда мешавад, ба намоиш гузошта шуд. Аз ҷумла, маҳсулоти заргарӣ, армуғонҳои гуногун, нишонҳои сарисинагӣ, қолабҳои гуногуни металлӣ, қолинҳои дастбоф ва маҳсулоти дӯзандагӣ пешниҳод гардид.

Бояд қайд кард, ки КВД “Фулузоти нодири Тоҷикистон” дар асоси дастур ва ҳидоятҳои Пешвои миллат корҳои навсозиву барқарорсозиро дар тамоми корхонаҳои зертобеи худ амалӣ намуда истодааст.

То имрӯз бо иштироки бевоситаи Сарвари давлат муҳтарам Эмомалӣ Раҳмон Корхонаи заргарии “Зари Суғд” бо 30 ҷойи корӣ ва Коргоҳи дӯзандагии КВД “Фулузоти нодири Тоҷикистон” бо 45 ҷойи корӣ мавриди баҳрабардорӣ қарор гирифтааст.

Зимни ифтитоҳ ва шиносоӣ бо дурнамои корхона, Президенти Ҷумҳурии Тоҷикистон муҳтарам Эмомалӣ Раҳмон масъулинро вазифадор карданд, ки корҳои навсозиву барқарорсозиро дар дигар коргоҳҳои Корхонаи воҳиди давлатии “Фулузоти нодири Тоҷикистон” мувофиқи нақша сомон диҳанд ва истеҳсоли маҳсулоти рақобатпазиру ивазкунандаи воридот ва ба содирот нигаронидашударо роҳандозиву тақвият бахшанд.

Эзоҳи худро нависед



Рамзҳо дар расм