Холиқзода Ҳоким, раиси Бонки миллии Ҷумҳурии Тоҷикистон, 10 феврали соли ҷорӣ зимни нишасти матбуотӣ рушди иқтисодиёти Тоҷикистонро дар соли 2020 муътадил арзёбӣ намуда, иттилоъ дод, ки маҷмӯи маҳсулоти дохилӣ дар ин давра ба 82, 5 млрд сомонӣ баробар шуд ва афзоиши воқеии он 4,5 %-ро ташкил дод.

Номбурда ҳамчунин гуфт, сатҳи таваррум бошад, дар ин давра 9,4 %-ро ташкил намуд, ки нисбат ба ҳамин давраи соли пешин 1,4 банди фоизӣ зиёд мебошад. Ин нишондиҳандаҳо асосан аз афзоиши сатҳи нархҳои маҳсулоти хӯрокворӣ - 13 %, ғайрихӯрокворӣ – 5,8 % ва арзиши хизматрасониҳои пулӣ ба аҳолӣ – 4 % ба амал омад.

Холиқзода Ҳоким афзоиши нархи маҳсулоти ниёзи аввалияро ба таъсири омилҳои берунӣ вобаста ба авҷ гирифтани бемории сироятии коронавирус рабт дода, аз ҷумла иброз дошт, ки “Бештар тағйирёбии нархи маҳсулоти ниёзи аввалия, аз қабили орди навъи якум - 16,4 %, шакар – 40,8 %, равғани пахта – 50,7 %, равғани офтобпараст – 42,6 %, гӯшти гов – 6,2 %, тухм – 18,9 %, картошка – 19,8 %, сабзӣ – 12,8 % ба қайд гирифта шуд”.

- Мо кӯшиш менамоем, ки сиёсати пулию қарзиро ба таъмини суботи молиявӣ ва мусоидат ба рушди устувори иқтисодиёт равона намуда, ҳаҷми пулро дар иқтисодиёт ба танзим дарорем, - гуфт дар идома Ҳ. Холиқзода. - Дар ин давра пардохтпазирии низоми бонкиро хубтар ба роҳ монда, қарзҳои батаъхирафтодаро коҳиш додем. Ин метавонад ба беҳтар гардидани сатҳи хизматрасонӣ ба аҳолӣ мусоидат намояд. Вобаста ба таъмини яке аз ҳадафҳои стратегии мамлакат – саноатикунонии кишвар тасмим гирифтаем, ки дар баробари дастгирии соҳибкорони хурду миёна миқдори қарзҳоро ба корхонаҳои истеҳсолии ватанӣ зиёд намоем.

Қайд гардид, ки соли 2020 ҳаҷми умумии пасандозҳо 11,4 млрд сомониро ташкил дод, ки нисбат ба соли 2019 - 1,7 млрд сомонӣ зиёд мебошад. Инчунин соли гузашта, қурби расмии сомонӣ 16,6 фоиз коҳиш ёфта, баъд аз тасҳеҳи якдафъаина барои 1 доллари ИМА 11,30 сомонӣ муқаррар гардид, ки фарқияти байни қурби расмӣ ва қурби бозори ғайрибонкии доллари ИМА ба 0,8 фоиз баробар шуд.