Имрӯз - 2 феврал, дар нишасти хабарии Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон (Тоҷикстандарт) иттилоъ дода шуд, ки соли 2025 бо мақсади ба танзим даровардани талаботи бехатарии иловагиҳои хӯрокворӣ, хушбуйкунандахо ва воситаҳои ёрирасони технологӣ ва истифодаи онҳо дар саноати хӯрокворӣ бо қарори Ҳукумати Ҷумҳурии Тоҷикистон Регламенти техникии “Талаботи бехатарии иловаҳои хӯрокворӣ, хушбӯйкунандаҳо ва воситаҳои ёрирасони технологӣ” қабул гардид.

Мирзоён Раҳмоншо, муовини аввали директори Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон зикр намуд, ки он аз соли 2026 мавриди амал қарор дода мешавад.

Ҳамчунин, ӯ гуфт, ки айни ҳол шумораи умумии регламентҳои техникии қабулгардида 22 ададро ташкил медиҳад ва онҳо барои таъмини бехатарии бозори истеъмолӣ мусоидат намуда истодаанд.

Бояд гуфт, ки Регламенти техникӣ ҳуҷҷати расмии ҳуқуқӣ мебошад, ки талаботи ҳатмиро нисбат ба маҳсулот, равандҳои истеҳсол, хизматрасонӣ ва корҳои техникӣ муайян мекунад, то ки бехатарӣ, сифат ва ҳифзи саломатии инсон, муҳити зист ва амнияти ҷомеа таъмин гардад.

Гулафшон КАРИМОВА, “ҶТ”