Донишгоҳи давлатии тиббии Тоҷикистон ба номи Абуалӣ ибни Сино ба рейтинги THE Asia University Rankings-2026 шомил шудааст.

Дар ин хусус имрӯз зимни нишасти хабарӣ Муҳиддин Нуриддин, ректори Донишгоҳи давлатии тиббии Тоҷикистон ба номи Абуалӣ ибни Сино хабар дода, таъкид намуд, ки бавоситаи ин дастовард Донишгоҳ ба як марҳилаи нави рушди байналмилалӣ қадам гузоштааст.

Ба гуфтаи ӯ, 23 апрели соли 2026 ташкилоти бонуфузи ҷаҳонии Times Higher Education (THE) Донишгоҳро расман ба феҳристи THE Asia University Rankings 2026 бо мақоми "Reporter" ворид намуд.

Зикр гардид, ки мақоми "Reporter" аз он шаҳодат медиҳад, ки Донишгоҳ марҳилаи пешниҳоди маълумоти институтсионалиро бомуваффақият паси сар намуда, дар пойгоҳи байналмилалии академии THE сабт шудааст. Ин дастовард имконият медиҳад, ки Донишгоҳ дар арсаи байналмилалӣ ҳамчун муассисаи таҳсилоти олии рақобатпазир муаррифӣ гардида, ҷойгоҳи худро дар миёни донишгоҳҳои пешсафи Осиё тадриҷан таҳким бахшад.

Таъкид шуд, ки шомил шудан ба ин рейтинг оғози марҳилаи нави рушд буда, роҳбарият ва ҳайати профессорону омӯзгорон тасмим доранд иқтидори илмӣ-тадқиқотӣ, сифати таълим ва фаъолияти илмиро боз ҳам тақвият бахшида, дар оянда ба ҷойгоҳи пурра дар рейтинг ноил гарданд.

Гулафшон КАРИМОВА, “ҶТ”